Eýroodaq halqy qatarynan tórtinshi jyl ósip keledi
ASTANA. KAZINFORM — 2025 jyldyń 1 qańtaryndaǵy jaǵdaı boıynsha Eýropalyq Odaqtyń (EO) halqy 450,4 mıllıon adamǵa jetti. Bul bir jyl burynǵy kórsetkishpen salystyrǵanda 1 070 702 adamǵa artyq. Osylaısha, COVID-19 pandemııasynyń saldarynan 2021 jyly oryn alǵan halyq sanynyń azaıýynan keıin, EO halqy qatarynan tórtinshi jyl ósip otyr, dep habarlaıdy Kazinform agenttiginiń menshikti tilshisi.
Halyq sanynyń artýy kóbine pandemııadan keıin kúsheıgen kóshi-qon aǵyndarymen túsindiriledi.
2012 jyldan bastap EO elderinde tabıǵı ósim teris mánge ıe boldy (ıaǵnı qaıtys bolǵandar sany týylǵandar sanynan asyp tústi), alaıda kóshi-qon esebinen bul ornyn toltyryp otyr.
Bul aqparat búgin Eurostat (Eýrostat) jarııalaǵan halyq sany týraly derekterge negizdelgen.
Aýqymdyraq qaraǵanda, 1960 jyly 354,5 mıllıon bolǵan EO halqy 2025 jyldyń 1 qańtaryna qaraı 450,4 mıllıonǵa jetip, 95,9 mıllıon adamǵa artty.
Sońǵy onjyldyqtarda halyq sanynyń ósý qarqyny birtindep baıaýlady: 2005 jyldan 2024 jylǵa deıin EO halqy jyl saıyn orta eseppen 0,9 mıllıon adamǵa artsa, al 1960 jyldary bul kórsetkish jylyna shamamen 3 mıllıon adam bolǵan.
2025 jyldyń 1 qańtaryndaǵy jaǵdaı boıynsha EO elderiniń halqy Germanııada – 83,6 mıllıonnan bastap, Maltada – 0,6 mıllıon adamǵa deıin qubylady. Germanııa (EO halqynyń 19%-y), Frantsııa (15%) jáne Italııa (13%) EO-daǵy eń tyǵyz qonystanǵan elder bolyp tabylady. Bul úsh memleket 2025 jyldyń basyndaǵy EO halqynyń jalpy sanynyń shamamen 47%-yn qurady.
2024 jyldyń 1 qańtarynan 2025 jyldyń 1 qańtaryna deıingi aralyqta EO-nyń 8 elinde halyq sany azaıǵan. Eń kóp qysqarý Latvııada tirkeldi (halyq sanynyń ózgerý koeffıtsıenti −9,9 adam / 1000 turǵyn), odan keıin Majarstan (−4,7), Polsha jáne Estonııa (−3,4).
Halyq sany ósý qarqyny boıynsha aldyńǵy qatarda turǵan 19 EO eli ishinde Malta kósh bastady (+19,0 / 1000 turǵyn), odan keıin Irlandııa (+16,3) jáne Lıýksembýrg (+14,7).
Aıta ketelik 1 maýsymdaǵy kórsetkishke saı Qazaqstan halqynyń sany 20 370 672 adamǵa jetken.