Eýroodaq Grýzııamen aradaǵy vızalyq rejimdi ońtaılandyrýdy maquldady
BRıÝSSELЬ. 19 qańtar. QazAqparat /Dımash Syzdyqov/- Seısenbi, 18 qańtar kúni ótken Eýroodaq Keńesiniń májilisinde Grýzııamen aradaǵy vızalyq rejimdi ońtaılandyrý jáne zańsyz turyp jatqan tulǵalardy readmıssııalaý týraly buǵan deıin qol qoıylǵan kelisimder maquldandy.
Bul eki qujat ta 2011 jyldyń 1 naýryzynan bastap kúshine enedi, dep habarlady EO Keńesiniń baspasóz qyzmetinen.
«Grýzııa men Eýroodaq arasyndaǵy vızalardyń berilý amaldaryn ońtaılandyrý týraly» kelisimge sáıkes, Grýzııa azamattarynyń 22 sanaty ońtaılandyrylǵan amaldar boıynsha vıza ala alady. Olarǵa, atap aıtqanda Eýroodaqta turatyn grýzın azamattarynyń jaqyn týystary, kásipkerler, ǵalymdar, stýdentter, jýrnalıster kiredi. Sondaı-aq konsýldyq alymnyń quny da 65 eýrodan 35 eýroǵa deıin arzandatylyp otyr. Azamattardyń 11 sanaty úshin jyldyq kóprettik vızalar engizilse, jekelegen jaǵdaılar úshin bes jyl merzimge qarastyrylǵan kóprettik vızalar engizilip otyr.
Grýzııamen vızalyq rejimdi ońtaılandyrý týraly kelisim Shengen aýmaǵyna kirmeıtin Ulybrıtanııadan jáne vızalyq rejimdi ońtaılandyrý jáne úshinshi eldermen readmıssııa týraly kelisimderge ádette qatyspaıtyn Danııa jáne Irlandııa elderinen basqa, Eýroodaqtyń barlyq elderine qatysty.
