Eýroodaq Grýzııaǵa qarsy jańa sanktsııalar engizýi múmkin
ASTANA. KAZINFORM – Eýropalyq odaq elderiniń syrtqy ister mınıstrleri 2027 jyldyń qańtarynda Grýzııaǵa qatysty jańa sharalar qabyldaý máselesin talqylaıdy. Buǵan eldegi demokratııalyq standarttardyń nasharlaýy sebep bolyp otyr, dep habarlaıdy Euronews.
Bul týraly 4 qarashada Eýropalyq odaqtyń syrtqy saıasat jónindegi joǵarǵy ókili Kaıa Kallas málimdedi.
Onyń aıtýynsha, Eýropalyq komıssııanyń EO-ǵa múshelikke úmitker elderdiń ilgerileýi týraly jyl saıynǵy esebinde Grýzııadaǵy demokratııalyq jaǵdaıdyń odan ári nasharlaǵany kórsetilgen.
Atap aıtqanda, qujatta azamattyq qoǵam qyzmetine jańa shekteýler engizilgeni jáne negizgi quqyqtar salasyndaǵy jaǵdaıdyń kúrdelene túskeni aıtylǵan.
– Grýzııa úkimeti demokratııalyq qundylyqtardan alshaqtaýyna baılanysty qazir Eýropalyq odaqpen teketireske bet alyp barady. Bul anyq baıqalyp otyr. Qabyldanǵan sharalar durys baǵytta emes, – dedi Kaıa Kallas baspasóz máslıhatynda.
Euronews tilshisiniń Grýzııa úkimetine qarsy jańa sanktsııalar usynyla ma degen suraǵyna jaýap bergen Kallas ázirge bul týraly aıtý erte ekenin jetkizdi. Onyń sózinshe, qańtardaǵy talqylaýdyń maqsaty – EO elderiniń ustanymdaryn kelisý.
– Biz úshin eń mańyzdysy – Grýzııa halqyn jáne onyń Eýropalyq odaqtyń bir bóligi bolýǵa degen umtylysyn qoldaıtynymyzdy aıqyn kórsetetindeı áreket etý. Sonymen qatar úkimetke onyń qazirgi saıasatyn qoldamaıtynymyz týraly naqty belgi berýimiz kerek. Qazir barlyq nusqa qarastyrylyp jatyr, – dedi EO syrtqy saıasat jónindegi joǵarǵy ókili.
2024 jyly Eýroodaqtyń dıplomatııalyq qyzmeti beıbit sherýlerdi kúshpen taratqany úshin jaýapty grýzııalyq sheneýnikterge sanktsııa engizýdi usynǵan. Alaıda bul bastamany Vengrııa men Slovakııa buǵattaǵan bolatyn.
Sodan beri Vengrııada bılik aýysyp, jańa úkimet Reseıge qarsy sanktsııalar máselesindegi ustanymyn aıtarlyqtaı ózgertken.
Soǵan qaramastan, Brıýssel Grýzııanyń dıplomatııalyq pasport ıelerine arnalǵan vızasyz rejımdi ýaqytsha toqtatty. Bul sheshim sanktsııalardan aıyrmashylyǵy, EO elderiniń biraýyzdan qoldaýyn talap etpeıtin bilikti kópshilik daýyspen qabyldanǵan.
Shekteý 2026 jyldyń naýryzynda bir jyl merzimge kúshine endi. Ony taǵy eki jylǵa deıin uzartýǵa bolady. Ol úshin Eýropalyq komıssııa 2027 jylǵy 6 qańtardan keshiktirmeı tıisti quqyqtyq akt qabyldaýy qajet.
2024 jyldyń qarashasynda Grýzııa bıligi 2028 jyldyń sońyna deıin Eýroodaqqa kirý jónindegi kelissózderdi bastaýǵa umtylmaıtynyn birjaqty málimdegen edi.
Al 3 qarashada Euronews uıymdastyrǵan EO-nyń keńeıýine arnalǵan sammıtte Grýzııa premer-mınıstri Iraklıı Kobahıdze eliniń Eýroodaqqa qosylý baǵytyn berik ustanatynyn aıtty. Alaıda Brıýsselmen qarym-qatynasty qalpyna keltirýdiń naqty josparyn usynbady.
Aıta keteıik, buǵan deıin Eýropalyq odaq úshinshi eldermen vızasyz qatynaý tártibin qatańdatqan bolatyn. Jańa erejelerge sáıkes, adam quqyqtarynyń buzylýy da vızasyz rejımdi ýaqytsha toqtatýǵa negiz bola alady.
