Eýroodaq Gazadaǵy densaýlyq saqtaý júıesine jasalǵan shabýyldarǵa alańdaýly
ASTANA. KAZINFORM – EO málimetinshe, Gaza sektorynda qaqtyǵys bastalǵaly 36 aýrýhananyń 31-i zaqymdanǵan nemese tolyqtaı qıraǵan.
Eýropalyq syrtqy áreket qyzmetiniń málimetinshe, qıraǵan ǵımarattar qatarynda Gaza sektoryndaǵy eń iri medıtsınalyq keshen, múlde isten shyqqan Ál-Shıfa aýrýhanasy da bar.
«Gazadaǵy qalǵan aýrýhanalar jartylaı jáne eleýli shekteýlermen jumys isteýde. Kúrdeli jaǵdaıǵa baılanysty olardyń kópshiligi kúıreý aldynda turdy nemese jabylýǵa májbúr boldy. Gazadaǵy palestınalyqtar únemi atqylaý jaǵdaıynda ómir súrip jatqanda jáne aýyr jaraqat alǵan 9 myńnan astam aýyr adam tıisti medıtsınalyq kómektiń joqtyǵynan ólim aýzynda turǵan kezde shuǵyl medıtsınalyq kómekke qol jetkizý odan da mańyzdyraq bolyp otyr», - dep atap ótti Eýroodaq ókilderi.
Ótken jyldyń 7 qazanynan beri DDU densaýlyq saqtaý mekemelerine barlyǵy 890 shabýyldy tirkedi, onyń 443-i Gazada jáne 447-si Batys jaǵalaýda boldy.
«Medıtsına qyzmetkerlerine, aýrýhanalarǵa jáne jedel járdem mashınalaryna jasalǵan shabýyldar adam ómiri úshin asa mańyzdy densaýlyq saqtaý qyzmetterine zııanyn tıgizedi. Bul shabýyldar toqtaýy kerek. Sonymen birge, halyqaralyq gýmanıtarlyq quqyq boıynsha azamattyq tulǵalardy mindetti qorǵaýǵa qatysty EO aýrýhanalardy medıtsınadan basqa kez kelgen maqsatta paıdalanýdy qatań aıyptaıdy», - dep atap ótti EO dıplomatııalyq qyzmeti.
EO sonymen qatar sońǵy aılarda 50-den astam densaýlyq saqtaý mekemesi men 300 jedel járdem kóligine qasaqana zaqym kelgen Batys jaǵalaýdaǵy densaýlyq saqtaý júıelerine shabýyldardyń jalǵasýyna alańdaıdy.
«Bizdiń kóz aldymyzda naqty ýaqytta adam tragedııasy bolyp jatyr. Eýropalyq Odaq Gaza sektoryndaǵy beıbit turǵyndardyń zardap shegýine qatty alańdaýly. Biz dereý atysty toqtatýǵa, barlyq kepilge alynǵandardy bosatýǵa jáne tolyq gýmanıtarlyq kómekke qol jetkizýge shaqyramyz», - dep atap ótti Brıýssel.
