Eýroodaq Eýropa kúnin atap ótedi
BRıÝSSELЬ. QazAqparat - Búgin Eýroodaq elderinde jyl saıynǵy beıbitshilik pen birlik merekesi - Eýropa kúni atalyp ótiledi. Ol sondaı-aq EO qurylýdyń bastaýyn salyp bergen «Shýman Deklaratsııasy kúni» retinde de belgili.
Osy merekeli kúnge baılanysty Eýroparlament tóraǵasy Martın Shýlts atap ótkendeı, «sońǵy bes jyldyń ishinde «daǵdarys» sózi Eýropamen baılanystyrylyp keldi. Keıbir eýropalyqtar EO-ny úmit emes, qasiret kózi, pana emes, qaýip retinde kóre bastady».
Osyǵan baılanysty, onyń pikirinshe, Eýropa kúni ótken jetistikterdi ǵana atap ótetin kún bolmaýy tıis. Ol kúni oı eleginen ótkizip, toptasýǵa jáne negizine eýropalyq joba alynǵan yntymaqtastyqty qaıtadan sezinýge qyzmet etýi tıis.
«Eýropa HHІ ǵasyrdyń qaterlerimen kúreste jáne alda turǵan mindetterdi sheshýde, halyqaralyq saýda nemese jahandyq jylyný, kóshi-qon nemes qaýipsizdik salalarynda bolsyn, bizdiń tańdaýly quralymyz bolyp tabylady», - dedi Eýroparlament basshysy M.Shýlts.
Eýropa kúni eýropalyqtar arasyndaǵy birlikti nyǵaıtý úshin qurylǵan eýropalyq sımvoldyń biri bolyp tabylady. Bul mereke Eýroodaq elderinde 1950 jylǵy 9 mamyrdaǵy Shýman deklaratsııasy qabyldanǵan kún qurmetine atalyp ótiledi. Oǵan sáıkes Eýropalyq odaqtyń alǵashqy nusqasy Eýropalyq qoǵamdastyq quryldy. Eýropa kúnin 9 mamyrda atap ótýdi 2008 jylǵy qazanda Eýropalyq parlament resmı bekitti.
