Eýroodaq elshileri álemdegi jaǵdaıdy talqylaý úshin Brıýsselde jınaldy

ASTANA. KAZINFORM — Búgin Brıýsselde Eýropalyq odaqtyń elshileriniń jyl saıynǵy konferentsııasy bastaldy. Іs-sharaǵa álemniń túkpir-túkpirinen kelgen EO-nyń 145 dıplomatııalyq ókildiginiń basshylary qatysýda, dep habarlaıdy Kazinform agenttiginiń Eýroodaqtaǵy menshikti tilshisi.

Eýropalyq buqaralyq aqparat quraldarynyń málimetinshe, bıylǵy konferentsııa buryn-sońdy bolmaǵan geosaıası turaqsyzdyq jaǵdaıynda ótip jatyr. Sondyqtan alǵashqy kúnniń negizgi taqyryptary Taıaý Shyǵys pen Ýkraınadaǵy jaǵdaı boldy.

Ashylý kúniniń basty oqıǵasy Eýropalyq komıssııa prezıdenti Ýrsýla fon der Lıaıenniń baǵdarlamalyq sózi boldy. Ol Eýroodaqtyń syrtqy saıasatta Odaq múddesine negizdelgen neǵurlym qatań baǵytqa túbegeıli bet burǵanyn atap ótti.

— Biz endi óz múddelerimizdi qorǵaýdyń jalǵyz joly retinde «erejelerge negizdelgen» júıege ǵana súıene almaımyz. Qaýipsizdik eýropalyq dıplomatııanyń negizgi qaǵıdasyna aınalýy tıis — qorǵanys, derekter, ónerkásip pen saýda salalarynyń barlyǵynda, — dedi fon der Lıaıen.

Eýrokomıssııa basshysy Eýroodaqtyń qorǵanysqa jumsaıtyn shyǵyny 2030 jylǵa qaraı 800 mlrd eýroǵa deıin jetetinin aıtty. Onyń sózinshe, soǵystan keıingi turaqtylyq kezeńinde qurylǵan ınstıtýttar qazirgi álemdegi ózgerister qarqynyna saı kelmeıdi. Ol Eýropany «strategııalyq turǵydan serpilis jasaýǵa» shaqyryp, odaqty beıbit joba ǵana emes, qýatty geosaıası oıynshyǵa aınaldyrý qajettigin aıtty.

Konferentsııa apta sońyna deıin jalǵasady. Erteń, 10 naýryzda, elshiler aldynda Eýropalyq keńes prezıdenti Antonıý Koshta sóz sóıleıdi. Onyń baıandamasynda Eýroodaqty keńeıtý strategııasy men odaqqa kandıdat eldermen qarym-qatynas máseleleri qaralady dep kútilip otyr. Sonymen qatar Islandııada ótýi múmkin referendým máselesi de talqylanýy múmkin.