Eýroodaq elshileri Reseıge qarsy sanktsııalardyń jańa paketin maquldady
Tıisti sheshim beısenbi kúni Frantsııanyń Eýroodaq tóraǵalyǵynyń Twitter-degi paraqshasynda jarııalandy, dep habarlaıdy QazAqparat reseılik TASS aqparat agenttigine silteme jasap.
«Reseıge qarsy óte mańyzdy sharalar paketi sanktsııalardy jańa salalarǵa salady. Atap ótkende, biz birneshe reseılik bankterdiń aktıvterin buǵattaý, Reseıden kómir ımporttaýǵa tyıym salý, Reseıge qarsy qarý embargosy, Reseıge joǵary tehnologııalyq taýarlardy eksporttaýǵa tyıym salý týraly aıtyp otyrmyz», - delingen málimdemede.
Tyıym salynǵan eksporttyq taýarlardyń kólemi 10 mlrd eýroǵa baǵalanady, al «shıkizat pen mańyzdy materıaldardyń» ımportyna qoıylǵan shekteýler 5,5 mlrd eýrony quraıtyn taýarlarǵa áser etedi.
Sonymen qatar, Reseı týymen júzetin kemelerge Eýropa elderiniń porttaryna kirýge tyıym salynady, al Reseı Federatsııasy men Belarýstiń kólik kompanııalary endi Eýroodaq aýmaǵynda jumys isteı almaıdy.
Málimdemede reseılik kásipkerler men «nasıhatshylarǵa» qatysty jańa shekteýler bólek jazylǵan. Sanktsııalar Reseı Qarýly Kúshteriniń Ýkraınadaǵy arnaıy áskerı operatsııasyna baılanysty qaýipsizdik qyzmeti, áskerıler jáne ónerkásip pen tehnologııalyq sektorlardaǵy kásiporyndardyń qyzmetkerlerine de qatysty.
«EO Keńesi atalǵan sharalar paketin jazbasha rásimniń bóligi aıasynda qabyldaıdy jáne erteń (8 sáýir - TASS) EO resmı jýrnalynda jarııalanýy tıis», delingen habarlamada.
Bir kún buryn Reseıge qarsy munaı embargosy EO-nyń talqylanyp jatqan sanktsııalarynyń besinshi paketine kirmeıtini, biraq Eýroodaq syrtqy ister mınıstrleri ony 11 sáýirde qarastyratyny týraly habarlanǵan.
