Eýroodaq elderiniń basshylary Mýammar Kaddafıdi bılikten bas tartýǵa shaqyrdy

11 naýryzda Brıýsselde ótken shuǵyl keńesinde, eýropalyq elderdiń basshylary Lıvııa basshysy Mýammar Kaddafıdi óz halqyna qarsy zorlyq-zombylyqty toqtatýǵa jáne bılikten bas tartýǵa shaqyrdy.

Eýroodaq Keńesiniń Prezıdenti Herman Van Rompeı kezdesýdiń qorytyndysy boıynsha ótken baspasóz máslıhatynda atap kórsetkendeı, Eýroodaqqa múshe 27 eldiń basshylarynyń Lıvııadaǵy jaǵdaıdy talqylaý úshin bas qosýy, atalmysh problemanyń mańyzdylyǵyn kórsetse kerek. Sońǵy 10 jyldyń ishinde mundaı shuǵyl keńes úsh ret shaqyrylǵan: Reseı men Grýzııanyń arasyndaǵy «tamyz oqıǵasyna», Iraktaǵy soǵysqa jáne AQSh-taǵy 11 qyrkúıektegi lańkester shabýylyna baılanysty. «Bizdiń ońtústik shekaramyzdaǵy jaqyn jerde bolyp jatqan halyq tóńkeristerin, joǵaryda atap ótken oqıǵalar sııaqty mańyzdy dep sanaımyz», - dedi eýropalyq sheneýnik.

Eýropa elderiniń basshylary Lıvııadaǵy demonstranttarǵa qarsy kúsh qoldaný faktisin taǵy da aıyptady jáne Eýroodaqtyń beıbit halyqty qorǵaý úshin qoldan kelgen barlyq sharany qabyldaıtyndaryn málim etti. Osy maqsatta eýropalyq kóshbasshylar Soltústik Afrıka men Taıaý Shyǵys memleketterimen konsýltatsııalar ótkizip, bolyp jatqan oqıǵalarǵa birlesip ún qatý máselelerin talqylamaq. «Biz Arab memleketteri lıgasyna, Afrıka odaǵy men Eýropalyq odaqqa kiretin elderdiń basshylarynyń qatysýymen joǵary deńgeıge shuǵyl kezdesýler ótkizýge shaqyramyz», - dedi H.V.Rompeı.

Eýroodaq sammıtinde sondaı-aq, Týnıs pen Mysyrdaǵy demokratııalyq ózgeristerge qoldaý bildirildi jáne atalǵan elderdegi ekonomıkalyq jáne saıası problemalardy sheshýge kómek usynyldy.