Eýroodaq elderi jazǵy jáne qysqy ýaqytqa kóshpeıtin boldy
ASTANA. QazAqparat - Eýroodaq elderi 2019 jyldyń qazan aıynan bastap jazǵy jáne qysqy ýaqytqa kóshpeıtin bolady. Bul týraly Eýroodaqtyń kólik komıssary Vıoletta Býlk Brıýsselde málim etti, dep habarlaıdy QazAqparat Habar 24 telearnasyna silteme jasap.
4,5 mln eýropalyq qatysqan saýalnama nátıjesi boıynsha, halyqtyń 84 paıyzy saǵat tilin aýystyrýǵa qarsy. Bul sheshim osy jyldyń sońyna deıin naqty qabyldanyp, keıin ony Eýroparlament pen Eýrokomıssııa maquldaýy tıis. «Alaıda protsess eki jylǵa deıin sozylýy múmkin», - deıdi mamandar. Esterińizge sala keteıik, Eýroodaq elderi 1996 jyldan beri jazǵy jáne qysqy ýaqytqa kóship otyrǵan. Sodan beri ýaqyttyń 60 mınýt artqa ne alǵa jyljýy adam densaýlyǵy men ekonomıkaǵa keri áserin tıgizedi degen daý-damaılar basylar emes.
«Jazǵy jáne qysqy ýaqytqa kóshýdi toqtatý kerek. Bul is Eýrokomıssııanyń quzyretinde. Eýroodaq elderiniń músheleri máseleni sheshý kerek. Biz ne jazǵy ýaqytta qalamyz, ne bolmasa taǵy bir ret qysqy ýaqytqa kóship, 2019 jyldan bastap ýaqytty ózgertpeımiz», - dedi Eýroodaqtyń kólik komıssary Vıoleta Býlk.
