Eýroodaq elderi Eýropa kúnin toılap jatyr
ASTANA. QazAqparat - Búgin Eýroodaq elderi Eýropa kúnin toılaýda. 1950 jyldyń 9 mamyrynda Frantsııa syrtqy ister mınıstri Robert Shýmannyń jarııalaǵan úndeýi jańa ıntegratsııalyq birlestik - Eýropalyq odaqtyń qurylýyna túrtki bolǵan edi, dep habarlaıdy 24.kz.
«Shýman deklaratsııasynda» Batys Germanııa, Frantsııa, Italııa jáne Benılıýks quramyndaǵy úsh memleketke kómir men bolat óndirý salalaryn biriktirý týraly alǵash ret úndeý jasalǵan bolatyn. Osy eki salany ulttyq memleketterden joǵary turatyn qurylymnyń basqarýyna tapsyrýǵa kelisken. Eýropalyq qaýymdastyqqa kirgen alty eldiń túgeli birlestiktiń Joǵarǵy Keńesine baǵynýǵa tıis bolǵan. Ekinshi dúnıejúzilik soǵys aıaqtalǵannan dál bes jyl ótkennen keıin osy Odaqty qurý týraly usynystyń maqsaty túsinikti edi. Osynyń arqasynda birikken elder bir-birinen qaýiptenbeı, jańa Eýropada beıbitshilik ornaýyna negiz qalaǵan bolatyn. Al Eýropa kúni, Eýroodaqtyń baıraǵy, ánurany jáne ortaq valıýtasymen qatar eýropalyqtardyń birlik rámizine aınalǵan. Alaıda búginde Kári Qurlyq talaı túıtkildi máselelerge tap boldy. Ekonomıkalyq pen bosqyndar daǵdarysy Shengen kelisiminiń bolashaǵy, tipti Eýroodaqtyń óziniń osy qalypta saqtalýyna kóleńke túsirip, qaýymdastyqqa kiretin 28 eldiń arasynda pikirkelispeýshilik týǵyzyp otyr. Jaqynda Rımde ótken Eýroodaq bolashaǵy jónindegi talqylaýda Odaq basshylary birlestiktiń keleshek taǵdyryna alańdaýshylyǵyn bildirdi.
"Burynǵy kezderi Maastrıht kelisimin daıyndaý úshin birlesip jumys istep kelgenbiz, birtindep ortaq valıýta qurýǵa jettik. Qazir sondaı birligimiz joq. Qoǵam pikiri men eýropalyq saıasatkerlerdiń kózqarasy alshaqtap bara jatqanyn baıqap turmyz. Ókinishke qaraı, olar áli kúnge deıin el-elge bólinip júr,-deıdi Eýrokomıssııa prezıdenti Jan-Klod ıÝnker. Al Eýroodaqtyń ózge bir jetekshisi, Eýroparlament basshysy Martın Shýlts búginde el basshylarynyń kóbisi óz memleketterin jaýapty seriktes retinde emes, Brıýssel jaǵynan qysym kórip júrgen tarap retinde kórsetetinin erekshe atap ótti.
Eýroparlament prezıdenti Shýltstiń aıtýynsha, búginde Brıýsselge kelip, óz elimniń múddesin qorǵaýǵa tıispin dep júrgen el basshylary bar. Bul sózderi Brıýssel jaǵynan qyspaqqa tústik degendi bildiredi. Odaqqa múshe osy elder Eýroodaq qorlarynan talaı paıda kórip júr. Bul Brıýssel olardy qyspaıtynyn, kerisinshe qoldaý berip júrgenin kórsetedi. Sol sebepten osy jolmen azamattar men saılaýshylardyń senimine bólenemiz dep, arzan bedelge qumar saıasatshylardyń artynan ermeýi tıis.
Eýropa kúniniń 67 jyldyǵy qarsańynda Eýroparlament pen Eýrokomıssııa basshylary Odaqqa múshe elderdi tyǵyz yntymaqtasýyn talap etip, tek surap qana qoımaı, bir-birine qoldaý berýge shaqyryp otyr.
