Eýroodaq Ebolamen kúresýge 140 mln. eýro bóledi
BRıÝSSELЬ. QazAqparat - Eýrokomıssııa Batys Afrıka elderindegi, atap aıtqanda, Gvıneıa, Serra-Leone, Lıberııa jáne Nıgerııadaǵy Ebola indetimen kúresý úshin 140 mıllıon eýro bóledi, dep habarlady eýropalyq organnyń baspasóz qyzmetinen.
«Halyqaralyq qaýymdastyq tarapynan kórsetilip jatqan kómekke, gýmanıtarlyq uıymdardyń talpynystaryna qaramastan jaǵdaı nasharlaıdy. Bul qaýippen kúresý úshin qajetti medıtsınalyq jabdyqty usynyp, seriktesterimizge júk tasymaldaýda járdemdesýimiz kerek», - dep atap ótti gýmanıtarlyq kómek jáne halyqaralyq yntymaqtastyq máseleleri boıynsha eýrokomıssar Krıstalına Georgıeva.
Bólinetin 140 mln. eýronyń 97 mln. eýrosy densaýlyq salasyndaǵy turǵyndarǵa kórsetiletin memlekettik qyzmetti jaqsartý úshin jáne makroekonomıkalyq turaqtylyqty qamtamasyz etý úshin Serra-Leone jáne Lıberııa bıligine jóneltiledi. 38 mln. eýro densaýlyq saqtaý júıesin qoldaýǵa baǵyttalady. 5 mln. eýro vırýsty anyqtaıtyn mobıldi zerthanalardy kúsheıtýge jáne medıtsına qyzmetkerleriniń sheberlikterin shyńdaýǵa jumsalmaq.
