Eýroodaq basshylary Ýkraınamen yntymaqtastyq qoryn qurýǵa kelisti

BRıÝSSELЬ. TASS – QazAqparat - Eýropalyq Odaqtyń memleket jáne úkimet basshylary Reseıdiń áskerı operatsııasy aıaqtalǵannan keıin eldi qalpyna keltirýdi qarjylandyrý úshin Ýkraınamen yntymaqtastyqtyń senimdi qoryn qurýǵa kelisti. Bul týraly Brıýsselde Eýroodaq sammıtiniń birinshi kúngi málimdemesinde aıtyldy, dep habarlaıdy QazAqparat TASS agenttigine silteme jasap.

«Reseı áskeriniń Ýkraınaǵa keltirgen qıratýlar men aýqymdy shyǵyndaryn eskere otyryp, EO Ýkraına úkimetine onyń shuǵyl qajettilikterin qanaǵattandyrý jáne Reseıdiń shabýyly aıaqtalǵannan keıin demokratııalyq Ýkraınany qalpyna keltirý úshin qoldaý kórsetýge daıyn. Osy maqsatta Eýropalyq keńes Ýkraınamen yntymaqtastyq qoryn qurýǵa kelisip, oǵan halyqaralyq seriktesterin qatysýǵa shaqyrady, sondaı-aq daıyndyqty keshiktirmeı bastaýǵa úndep otyr», - delingen málimdemede.

Sammıtke qatysýshylar sonymen qatar Kıevke Lıvııa men Sırııaǵa kómek kórsetý úshin ótkizilgen turaqty konferentsııalar sııaqty halyqaralyq donorlar konferentsııasyn ótkizýge ýáde berdi.

Qujatta Eýropalyq Odaqtyń Ýkraınaǵa saıası, qarjylyq, materıaldyq jáne gýmanıtarlyq qoldaý kórsetýdi jalǵastyratyny basa aıtylǵan.

Eýroodaq elderiniń kóshbasshylary sondaı-aq Reseı men Belarýske qarsy jańa qatań sanktsııalar engizýge daıyn ekenin málm etti. «Sanktsııalardan aınalyp ótý nemese Reseıge basqa da jolmen kómektesý áreketine jol berilmeýi tıis», - dedi olar.

Sonymen qatar, Eýroodaq elderiniń basshylary Ýkraınany gaz jáne elektr qýatymen úzdiksiz qamtamasyz etýge daıyn ekenin bildirdi.