Eýroodaq basshylary Pýtın men Tramp kezdesýinen keıin birlesken málimdeme jasady

ASTANA. KAZINFORM – Pýtın men Tramptyń Alıaskadaǵy kezdesýinen keıin EO kóshbasshylary Zelenskııdiń qatysýymen úshjaqty sammıtti kútetinin tilge tıek etti, dep habarlaıdy Kazinform CNN-ge silteme jasap.

Bul týraly eýropalyq kóshbasshylardyń birlesken málimdemesinde aıtylǵan. 

– Biz Ýkraınanyń egemendigi men aýmaqtyq tutastyǵyn tıimdi qorǵaý úshin qaýipsizdik kepildigine ıe bolýy kerektigin anyq aıtamyz. Biz prezıdent Tramptyń Amerıka Qurama Shtattary qaýipsizdik kepildigin berýge daıyn degen málimdemesin quptaımyz. «Qalaýlylar koalıtsııasy» belsendi ról atqarýǵa daıyn, - delingen qujatta. 

Birlesken málimdemege Germanııa kantsleri Frıdrıh Merts, Frantsııa prezıdenti Emmanýel Makron, Italııa premer-mınıstri Djordjıo Melonı, Ulybrıtanııa premer-mınıstri Keır Starmer, Fınlıandııa prezıdenti Aleksandr Stýbb, Polsha premer-mınıstri Donald Týsk, Eýropalyq komıssııa tóraǵasy Ýrsýla fon der Leıen jáne Eýropalyq keńes tóraǵasy Antonıo Kosta qol qoıdy. 

Zelenskıımen jáne eýropalyq kóshbasshylarmen sóıleskennen keıin Tramp «AQSh-tyń qaýipsizdik kepildigin berýge daıyn ekenin» málimdedi. 

– Reseı men Ýkraına arasyndaǵy jan túrshigerlik soǵysty toqtatýdyń eń durys joly – kóp jaǵdaıda oryndalmaıtyn atysty toqtatý týraly kelisimge emes, tikeleı soǵysty aıaqtaıtyn bitimgershilik kelisimge kóshý degenge bári qosyldy. Prezıdent Zelenskıı dúısenbi kúni tústen keıin Vashıngtondaǵy Sopaq keńsesine keledi. Eger bári oıdaǵydaı bolsa, biz prezıdent Pýtınmen kezdesýdi belgileımiz, - dep jazdy Tramp Truth Social paraqshasynda. 

Buǵan deıin úsh saǵatqa jýyq ýaqyt kelissóz júrgizgen Tramp pen Pýtın kelisimge kele almaǵanyn jazǵan bolatynbyz.