Eýroodaq avtokólikterdi tekserýdiń jańa erejesin engizbek
ASTANA. QazAqparat - Eýroodaqta 1 qyrkúıekten bastap avtokólik qozǵaltqyshtarynyń aýaǵa zııandy gazdar shyǵarý deńgeıin tekserýdiń jańa erejesin engizedi, dep habarlaıdy euronews.com .
Burynǵy testilerge kómirqyshqyl gazy men azot totyǵyn shyǵarý, sondaı-aq janarmaı tutyný boıynsha kúsheıtilgen zerthanalyq tekserýler qosyldy.
Naqtyly jaǵdaılardyń barysy týraly brıtandyq kólik jáne qorshaǵan orta mamany áńgimeleıdi.
«Gaz shyǵaratyn tútikke ony esepteıtin qondyrǵy ornatylady, - deıdi Greg Archer. - Keıin avtomobıldi jolǵa shyǵaryp, kólik shyǵaryp jatqan tútin quramyndaǵy aýany lastaıtyn zattardyń mólsheri esepteledi».
Jańa modeldegi avtokólikterdiń barlyǵy tekserýden ótedi. Brıtandyq sarapshy Eýroodaqta mundaı máseleler boıynsha ortaq kelisimge kelýdiń qıyndyǵyn eskere otyryp, bul jańa júıeniń shekten tys talapshyl bolyp shyǵýy múmkin degen qaýpin jasyrmady.
«Shyn máninde avtokólikterdi kim tekseretini, nátıjeler qalaı tirkeletini jóninde naqty sheshim qabyldanýy tıis, - deıdi Greg Archer. - Odaqqa múshe elder, Eýrokomıssııa, Eýroparlament arasynda jańa erejelerdi engizý boıynsha kúrdeli kelissózder júrgizý máselesi tur. Sodan keıin ǵana tutynýshylardyń seniminen shyǵýǵa bolady», - deıdi ol.
Kóliktiń shyǵaryndy gazyn tekserý erejelerin qaıta qaraý máselesi 2015 jyly Volkswagen kontserni aınalasyndaǵy shyqqan daý-damaıdan soń týyndady. Germanııanyń kólik jasaýshy kompanııasy dızelmen júretin qozǵaltqyshtaryna kólik shyǵarǵan tútinniń quramyndaǵy ýly zattardyń mólsherin azaıtyp kórsetetin arnaıy baǵdarlama ornatqanyn moıyndaǵan bolatyn.
