Eýroodaq Apple men Meta kompanııalaryna aıyppul saldy
ASTANA. KAZINFORM — Tsıfrlyq naryqtar týraly zań (DMA) aıasynda salynǵan alǵashqy aıyppuldar Apple kompanııasyna – 500 mln eýro, al Meta (Facebook) kompanııasyna – 200 mln eýrony qurady.
Búgin Eýropalyq komıssııa eki iri tehnologııalyq alpaýytty paıdalanýshylar tańdaýy men ádil básekelestik qaǵıdalaryn buzǵany úshin jazalady. Bul – Eýroodaqtyń ınternet salasyna qatysty mańyzdy zańdarynyń biri boıynsha alǵashqy aıyppuldar.
Tsıfrlyq naryqtar týraly zań (DMA) tehnologııalyq kompanııalar arasyndaǵy ádil iskerlik tártipti qamtamasyz etýge baǵyttalǵan. Bul aıyppuldar AQSh prezıdenti Donald Tramptyń ákimshiligimen Eýropa arasyndaǵy ınternetti retteý máselesine baılanysty jańa kelispeýshilikke ulasýy múmkin.
Eýrokomıssııa Apple kompanııasyna «App Store» dúkeninen tys qosymshalardy taratýǵa tyıym salǵany úshin 500 mln eýro aıyppul saldy. Komıssııanyń aıtýynsha, mundaı shekteýler ázirleýshilerge balama arnalardy tolyq paıdalaný múmkindigin bermeı, tutynýshylardyń arzanyraq usynystarǵa qol jetkizýine kedergi keltiredi.
Endi Apple kompanııasyna bul shekteýlerdi 60 kún ishinde alyp tastaý mindetteldi. Áıtpese, qosymsha aıyppuldar salynady. Kompanııa bul sheshimge shaǵymdanatynyn málimdedi.
Meta kompanııasy 2023 jyldyń qarashasynda Eýroodaqtaǵy paıdalanýshylarǵa «kelisim nemese tólem» modelin usynǵany úshin 200 mln eýro aıyppul tóleýge mindetteldi. Bul model boıynsha qoldanýshylar derekterin jarnamalyq maqsatta paıdalanýǵa kelisim berýi nemese jarnama kórsetilmeıtin aqyly qyzmetti tańdaýy qajet boldy.
Eýrokomıssııa bul tásil DMA talaptaryna sáıkes kelmeıtinin aıtty. Olardyń aıtýynsha, paıdalanýshylar Facebook pen Instagram-da derbestendirilgen jarnama qyzmetine uqsas, biraq jeke derekteri azyraq qoldanylatyn balama qyzmetti tegin paıdalana alýy tıis.
Eýroodaq ókilderi Meta kompanııasynyń 2024 jyldyń qarashasynda usynǵan jańartylǵan jarnama modelin áli de baǵalap jatqanyn habarlady. Atalǵan aıyppul DMA zańy 2024 jyldyń naýryzynda zańdy kúshine engennen keıingi segiz aı ishinde anyqtalǵan sáıkessizdikke baılanysty salynyp otyr.
Aıta keteıik, Eýroodaq azamattary úshin Ulybrıtanııaǵa kirý aqyly bolady.