Eýroodaq álemde birinshi bolyp jasandy ıntellektten qorǵaný týraly zań qabyldaıdy

BRıÝSSELЬ. QazAqparat – Sársenbide Eýroparlament jasandy ıntellekt týraly zań qabyldady. Endi ol Eýropalyq keńeste EO-nyń barlyq elderi kelisip, maquldaǵannan keıin kúshine enedi, dep habarlaıdy QazAqparat VVS-ge silteme jasap.

Zańda JI júıeleri eýropalyq azamattar men tutynýshylar úshin táýekel dárejesi boıynsha toptarǵa bólinedi jáne ár top úshin óz shekteýleri men baqylaý sharalary engizilgen. Mysaly, adamdardyń sanasyna áser etý úshin qurylǵan júıeler, sondaı-aq naqty ýaqyt rejıminde jumys isteıtin bıometrııalyq taný júıelerine tyıym salynady. ChatGPT tárizdi kontent jasaıtyn júıeler óz ónimderin naqty belgilep, ony tiri adamdardyń shyǵarmashylyǵy retinde kórsetpeýi kerek.

«Eýroparlament depýtattary jasandy ıntellekt júıeleriniń adamdardyń baqylaýynda bolýyn, olardyń qaýipsiz, ashyq, qadaǵalanatyn, paıdalanýshylardy kemsitpeýin jáne qorshaǵan ortany qorǵaýǵa yqpal etýin qamtamasyz etkisi keledi», – dep túsindirdi Eýroparlamenttiń baspasóz qyzmetinen mamyr aıynda zań jobasyn ázirleý barysynda.

13 maýsymda ótken pikirtalas kezinde Eýroparlament depýtattary betti taný júıeleri týraly tarmaqtarǵa kóp kóńil bóldi. Jobada mundaı júıelerdi tek «postfaktým» (naqty ýaqyt rejıminde emes), tek qylmyskerlerdi, terrorısterdi jáne joǵalǵan adamdardy izdeý úshin jáne tek sot sheshimimen qoldanýǵa ruqsat berý usynylady. Eýrodepýtattarynyń kópshiligi mundaı sheshimge daýys daýys bergen. Biraq keıbiri bet-álpetti taný júıelerine múldem tyıym salýǵa shaqyrady.