Eýroodaq AQSh-tan ákelinetin kólikterge baj salyǵyn alyp tastaıdy

ASTANA. KAZINFORM — AQSh prezıdenti Donald Tramppen jasalǵan saýda kelisimi aıasynda Eýroodaq amerıkalyq avtokólikterge «nóldik tarıf» engizýge kóshetinin málimdedi, dep habarlaıdy DW.

Eýroodaq pen AQSh arasyndaǵy saýda kelisiminiń kóptegen egjeı-tegjeıi áli jarııa etilmese de, bolashaqta amerıkalyq kólikter Eýropa naryǵyna kedendik baj salyǵynsyz kirgiziletin bolady. Bul kelisimge Donald Tramppen Shotlandııada ótken kelissózder barysynda qol jetkizilgenin EO ókili Brıýsselde rastady, dep habarlaıdy dpa agenttigi 28 shilde, dúısenbi kúni.

— Biz nóldik tarıfke kóshýge daıynbyz, — dedi Eýrokomıssııa ókili.

Onyń aıtýynsha, qazirgi kezde kúshinde turǵan 10% kedendik baj salyǵyn alyp tastaý úshin AQSh óz tarapynan kelisimniń sharttaryn oryndap, EO-dan keletin kólikterge salynatyn 27,5% tarıfti 15%-ǵa deıin tómendetýi tıis.

Dpa agenttigi atap ótkendeı, mundaı jeńildikter eýropalyq avtokólik óndirýshiler úshin básekelestiktiń kúsheıýine alyp keledi. Alaıda Eýrokomıssııa tóraıymy Ýrsýla fon der Lıaıenniń aıtýynsha, eger kelisimge qol jetkizilmegende, 1 tamyzdan bastap AQSh EO-dan keletin kólikterge 30% baj salyǵyn engizetin edi.

Aıta keteıik, keshe Tramp pen fon der Lıaıen Shotlandııanyń batysyndaǵy Ternberrı qalasynda kezdesip, EO ónimderine 15% kólemindegi tarıf engizýdi kózdeıtin saýda kelisimine qol jetkizgen bolatyn.