Eýroodaq AQSh-pen saýda kelisimin bekite almady
ASTANA. KAZINFORM — Eýropalyq odaq elderi AQSh-pen jasalǵan saýda kelisimin ózara bekite almady, dep habarlaıdy Kazinform agenttiginiń Brıýsseldegi menshikti tilshisi.
6 mamyr keshinde Eýroparlament, Eýropalyq keńes jáne Eýropalyq komıssııa ókilderiniń kezdesýi ótti. Alaıda kelissózder nátıjesiz aıaqtalǵan.
Taraptar 2025 jyldyń shildesinde jasalǵan AQSh-pen saýda kelisimine engiziletin túzetýlerdi talqylaǵan. Qujatta AQSh-qa eksporttalatyn eýropalyq taýarlarǵa 15 paıyzdyq baj salyǵyn engizý qarastyrylǵan.
Buǵan deıin Donald Tramp Eýroodaqqa qarsy 30 paıyzdyq tarıf engizetinin aıtqan edi. Alaıda ótken jylǵy kelissózder barysynda bul kórsetkishti tómendetýge múmkindik týǵan. Óz kezeginde Eýroodaq amerıkalyq taýarlarǵa nóldik baj salyǵyn engizýge kelisken.
Sonymen qatar kelisimde Eýroodaqtyń AQSh-tan 750 mıllıard dollar kóleminde energııa resýrstaryn satyp alýy jáne amerıkalyq ekonomıkaǵa 600 mıllıard dollar ınvestıtsııa quıýy týraly aıtylǵan.
Kelisimdi bekitý protsesi sozylyp ketkendikten, bıyl 1 mamyrda Tramp Eýroodaqtan ákelinetin jeńil jáne júk kólikterine baj salyǵyn 25 paıyzǵa deıin kóteretinin málimdedi. Onyń sózinshe, Eýroodaq saýda kelisiminiń sharttaryn oryndamaǵan.
Aıta ketelik Eýroodaq AQSh taýarlaryna salyq salatyny týraly jazǵan edik.
