Eýroodaq AQSh taýarlaryna salyq salmaq
ASTANA. KAZINFORM – Eýroodaq bıligi AQSh-tan keletin 72 mlrd eýronyń taýaryna baj salyǵyn daıyndap qoıdy. Bul AQSh prezıdenti Donald Tramptyń qoqan-loqysyna jaýap bolmaq.
Bul týraly dúısenbi, 14 maýsym kúni saýda jónindegi eýrokomıssar Marosh Shefchovıch málim etti.
DW-niń habarlaýynsha, Eýroodaq bıligi Amerıkanyń quny 72 mlrd eýro bolatyn taýarlarynyń tizimin daıyndap qoıdy. Olarǵa baj salyǵy salynatyn bolady. Bul AQSh-tyń salyq saıasatyna jaýap bolmaq.
- Búgin Eýrokomıssııa uıymǵa múshe elderge AQSh-tan ımporttalatyn quny 72 mlrd eýro bolatyn taýarlardyń tizimi boıynsha usynys jasaıdy. Endi olar osy tizimdi talqylaı alady,-dep keltirdi sheneýniktiń sózin EK saıty.
-Bul bizdiń sońǵy quralymyz emes,-dedi M. Shefovıch.
Ol qandaı taýarlar týraly áńgime bolyp jatqanyn naqtylamady.
Soǵan qaramastan Brıýssel áli de bolsa Vashıngtonmen kelissózder júrgizýge daıyn.
- Bizdiń transatlantıkalyq qarym-qatynastarymyz kelissózder arqyly sheshilýge laıyqty, -dedi eýrokomıssar.
12 shilde kúni Donald Tramp Eýroodaqtan keletin taýarlarǵa 1 tamyzdan bastap, 30% kedendik alym salýdy josparlap otyrǵanyn málimdedi. Ol buny Brıýssel men Vashıngton arasynda eń úlken saýda defıtsıtimen baılanystyryp otyr.
Aq úı basshysy eger eýropalyq kompanııalar ónimdi AQSh-ta shyǵaratyn bolsa, olar saýda salyǵynan bosatylatynyn aıtty.
Sonda-aq Tramp eger Eýroodaq amerıkalyq taýarlarǵa salyq salatyn bolsa, oǵan jaýap ta týra sondaı bolatynyn jetkizdi.
Osyǵan deıin Tramp tarıfteriniń saldarynan aıfondar men Eýroodaq taýarlary qymbattaýy múmkin ekeni týraly jazdyq.
