Eýroodaq 5G tehnologııasyn engizýde Koreıa men Japonııany qýyp jetpekshi
ASTANA. KAZINFORM — Boljamdarǵa sáıkes, Eýroodaq 2027 jyly «besinshi býyndaǵy» jelilermen 100% qamtýdy qamtamasyz etedi, dep jazdy Euronews.
Baıaý bolsa da, turaqty túrde: Eýropa 5G avtonomdy jelilerin engizýde artta qalyp kele jatqanyna qaramastan, ol birtindep álemniń basqa aımaqtaryn qýyp jetýge jaqyn dep jazylǵan dúısenbi kúni Eýropalyq komıssııa jarııalaǵan baılanys jáne kommýnıkatsııalar salasyndaǵy maqsattar týraly esepte.
«Tsıfrlyq onjyldyq» dep atalatyn qujatta Komıssııa 2021 jyly jarııalaǵan 2030 jylǵa qaraı EO-nyń barlyq úı sharýashylyqtaryn 5G-men qamtamasyz etý maqsatyna qol jetkiziledi degen boljam aıtylǵan.
– 5G jelisimen qamtylǵan úı sharýashylyqtarynyń úlesi (spektrdiń barlyq dıapazonynda) 2023 jylǵy 89,0%-dan 2024 jyly 94,3%-ǵa deıin ósti. Bul jyldyq eseppen 6%-ǵa ósimdi bildiredi. Boljam boıynsha, 100% mejege 2027 jyly qol jetkiziledi, – delingen esepte.
Aýyldyq aımaqtarǵa kelsek, munda 5G qamtylýy 2023 jylǵy 71%-ben salystyrǵanda shamamen 80%-ǵa jetti.
Koreıa 100% kórsetkishpen kósh bastap tur, odan keıin Japonııa (99,2%) men Norvegııa (99,0%) keledi. AQSh (97,0%), Úndistan jáne Qytaı (ekeýi de 95%) da EO deńgeıinen joǵary nemese teń kórsetkishke ıe.
5G baılanysyna degen qajettilik ınternetke qosylǵan qurylǵylardyń keńinen qoldanylýymen, óndiristik jabdyqtarmen jáne beriletin derekter kóleminiń artýymen baılanysty.
Qoıylǵan maqsattar
Baıandamada tsıfrlyq daǵdylar, bulttyq tehnologııalardy paıdalaný jáne jasandy ıntellekt máseleleri de qamtylǵan. Jalpy alǵanda, 2024 jylǵa qaraı EO negizgi memlekettik qyzmetterdi tsıfrlandyrýda «turaqty ilgerileýshilikke» qol jetkizdi, degenmen memlekettik tsıfrlyq ınfraqurylymnyń edáýir bóligi EO-dan tys jetkizýshilerge táýeldi bolyp qala beredi.
– Derekter naryqtardyń bytyrańqylyǵy, tym kúrdeli retteý, qaýipsizdik jáne strategııalyq táýeldilik sııaqty problemalardyń áli de saqtalyp otyrǵanyn kórsetedi. Memlekettik jáne jeke ınvestıtsııalar, sondaı-aq EO kompanııalary úshin venchýrlik kapıtalǵa qol jetkizýdi jeńildetý ınnovatsııalardy engizýdi jáne aýqymyn keńeıtýdi jedeldetedi, – delingen esepte.
Jeltoqsan aıynda Komıssııa baılanys máselelerin sheshýge baǵyttalǵan telekommýnıkatsııalyq erejelerdi qaıta qarastyratyn tsıfrlyq jeliler týraly zańdy (DNA) usynady. Qazirgi ýaqytta zań jobasyn ázirleýge baılanysty keńester júrgizilip jatyr.
Bolashaq tehnologııalardyń múmkindigin ashý
Connect Europe telekommýnıkatsııalyq kompanııasynyń bas dırektory Alessandro Gropellı Eýrokomıssııa esebiniń qorytyndylaryna pikir bildire otyryp, «Eýropanyń baılanys salasyndaǵy saıasatyn túbegeıli reformalaý qajet» dedi.
– Biz Dragı baıandamasynan shabyttanǵan, órshil tsıfrlyq jeliler týraly zańdy qoldaımyz: XXI ǵasyrda básekege qabilettilik tek senimdi ári turaqty baılanys bolǵanda ǵana múmkin, – dep qosty ol.
GSMA uıaly baılanys operatorlarynyń eýropalyq bólimshesiniń basshysy Laslo Tot esep jigerlendiretinin, biraq áli de bosańsýǵa bolmaıtynyn aıtty.
– Eýropa boıynsha 5G bazalyq qamtý deńgeıine jetý – bir másele, al adamdardy qajetti deńgeıdegi naqty qosylymmen qamtamasyz etý – qazirgi retteý jaǵdaıynda úlken másele. Komıssııa aldaǵy DNA keńesteri kezinde bolashaqqa kóz júgirtýdi jalǵastyryp, normalardy jeńildetýge jáne tsıfrlyq ekojúıemiz shynymen órkendeı alatyn qolaıly ınvestıtsııalyq ortany qalyptastyrýǵa yqpal etýi tıis, – dedi Tot.
Endi blokqa múshe 27 el Komıssııa esebin jáne odan ári atqarylatyn sharalardy talqylaýy qajet. Kelesi jyly EO-nyń atqarýshy bıligi óz maqsattaryn qaıta qarap, olardyń qoǵamnyń ózgerip jatqan talaptary men basymdyqtaryna sáıkes keletin-kelmeıtinin anyqtaıdy.
Eske sala keteıik, buǵan deıin Eýropalyq Odaq Temu men Shein-niń arzan taýarlaryna baj salyǵyn engizýdi usynǵan edi.