Eýroodaq 18 jastaǵy balalarǵa DiscoverEU saıahat bıletterin tegin taratady
ASTANA. KAZINFORM — Eýropalyq Odaq DiscoverEU baǵdarlamasyna jańa irikteý jarııalap, Eýropa boıynsha 40 myń tegin poıyz bıletin oınatyp jatyr, dep habarlaıdy DW.
Ótinimder 2026 jylǵy 8 sáýir men 22 sáýir aralyǵynda qabyldanady. Jerebege Eýropalyq Odaq elderinde, sondaı-aq Norvegııa, Islandııa jáne Túrkııany qosa alǵanda birqatar assotsıatsııalanǵan memleketterde turatyn, 2007 jylǵy 1 shilde men 2008 jylǵy 30 maýsym aralyǵynda týǵan jastar qatysa alady.
DiscoverEU baǵdarlamasy Eýropa elderi arasynda negizinen poıyzben saıahattaýǵa jáne ártúrli qalalar men mádenıettermen tanysýǵa múmkindik beredi. Jol júrý bıletinen bólek, qatysýshylarǵa ártúrli qalalarda turý, murajaılarǵa, mádenı is-sharalarǵa jáne sport nysandaryna kirý kezinde jeńildikter beriledi.
Іrikteý eki kezeńnen turady: aldymen qatysýshylardyń onlaın-vıktorınadaǵy jaýaptary baǵalanady, sodan keıin ótinim kóp bolǵan jaǵdaıda birinshi kezeńnen ótkender arasynda kezdeısoq jerebe ótkiziledi.
DiscoverEU Pass — bul bir aı boıy Eýropa boıynsha poıyzben saıahattaýǵa múmkindik beretin jol júrý bıleti. Alaıda naqty paıdalaný 7 kúnnen keıin shekteledi. Marshrýtty arnaıy DiscoverEU Travel qosymshasy arqyly óz qalaýy boıynsha qurýǵa bolady. Jeke de, 5 adamǵa deıingi toppen de saıahattaýǵa bolady.
Eń tanymal baǵyttar: Italııa (Rım, Florentsııa, Venetsııa), Frantsııa (Parıj, Lıon, Nıtstsa), Ispanııa (Barselona, Madrıd), Germanııa (Berlın, Mıýnhen), Nıderland (Amsterdam), Chehııa (Praga) jáne Avstrııa (Vena, Zaltsbýrg).
Ádette qatysýshylar 4–6 qala tańdap, árqaısysynda birneshe kún aıaldaıdy jáne marshrýtty aınalmaly túrde quryp, barǵan jolmen qaıtpaýǵa tyrysady.
DiscoverEU baǵdarlamasy Erasmus+ baǵdarlamasynyń bir bóligi. Ol jastardyń mobıldiligin, mádenı almasýyn jáne bilim alýyn qoldaýǵa baǵyttalǵan.
Aıta keteıik, Qatar týrısterdi tegin qonaqúıge ornalastyrý baǵdarlamasyn toqtatty.
