Eýroodaq 12 qazannan bastap elge kirý erejelerin ózgertedi
ASTANA. KAZINFORM — Osy jyly 12 qazannan bastap Eýropa elderine saıahattaıtyn týrıster úshin shekaralyq baqylaý rásimderindegi eleýli ózgerister bolady, dep jazdy AZERTADJ.
Dál osy kúni Eýropalyq Odaq dástúrli pasportqa mór basý júıesiniń ornyna, tsıfrlyq bıometrııalyq skanerleýge negizdelgen jańa Kirý/Shyǵý júıesin (EES) iske qosady. Bul júıe EO-ǵa kirmeıtin elderdiń azamattaryna qoldanylady.
Bıometrııalyq derekterdi tapsyrýdan bas tartýǵa bolmaıdy — mundaı jaǵdaıda kirýge ruqsat berilmeıdi. Jınalǵan derekter úsh jyl boıy saqtalyp, sodan keıin avtomatty túrde joıylady.
Jańa júıe Kıpr men Irlandııadan basqa barlyq EO elderinde, sondaı-aq EO-ǵa kirmeıtin Shengen aımaǵynyń tórt memleketinde — Islandııa, Lıhtenshteın, Norvegııa jáne Shveıtsarııada qoldanylady.
EES júıesiniń iske qosylýy aldaǵy taǵy bir mańyzdy ózgeriske daıyndyq kezeńi retinde qarastyrylady — ol Eýropalyq aqparattyq jáne saparǵa ruqsat berý júıesiniń (ETIAS) engizilýi. Bul júıe 2026 jyldyń sońynda iske qosylady.
ETIAS júıesi boıynsha, EO-ǵa kirmeıtin elderdiń azamattary Shengen aımaǵyna sapar sheger aldynda 20 eýro mólsherinde alym tólep, aldyn ala ruqsat alýy tıis bolady.
Eýropalyq Odaq jaqynda AITV-ǵa qarsy jańa vaktsınany qoldanýǵa ruqsat bergen bolatyn.