Eýronyń dollarǵa qatysty baǵamy nyǵaıyp keledi

BRıÝSSELЬ. QazAqparat – Dúısenbide eýronyń 2022 jyldyń sáýirinen bergi dollarǵa qatysty baǵamy eń joǵary mánge jetti. Qazirgi ýaqytta 1 eýro 1,0927 dollardy qurap otyr, dep habarlaıdy QazAqparat menshikti tilshisi.

Qazirgi kórsetkishter ótken jyldyń jazyndaǵy eýro baǵamynan shamamen 15% joǵary. Osy kezeńde energııa baǵasynyń kúrt ósýi eýronyń jıyrma jyldyq eń tómengi deńgeıine - 0,9536 dollarǵa deıin quldyraýyna ákelgen edi.

Degenmen áli de kóptegen ekonomıster men bankter eýroaımaqtyń ekonomıkalyq bolashaǵy bulyńǵyr dep esepteıdi: belgııalyq l'Echo gazeti bıylǵy birinshi toqsanda eýroaımaq tehnıkalyq retsessııaǵa ushyraıdy dep boljap otyr, al Dúnıejúzilik bank 2023 jyly eýroaımaq 0%-tik ósim kórsetedi dep joramaldaıdy. Byltyrǵy maýsymda bul boljam 1,9% deıngeıinde bolǵan edi.

Eýronyń nyǵaıýyna áser etken negizgi faktorlardyń biri - sońǵy birneshe aptada gazdyń arzandaýy. Oǵan sebep qystyń ádettegiden jyly bolýy.

Eýronyń ósýine yqpal etken ekinshi, tipti odan da mańyzdy sebep - Eýropa ortalyq banki belgilegen baǵam. Eýroaımaqtaǵy ınflıatsııany aýyzdyqtaý úshin Eýropa banki bıyldyń ózinde tórt ret bazalyq mólsherlemeni kóterdi.

Beısenbi kúni EOB prezıdenti Krıstın Lagard Davostaǵy Dúnıejúzilik ekonomıkalyq forýmda ınflıatsııa áli de tym joǵary ekenin jáne EOB onyń deńgeıin 2% túsirý baǵytynda jumys isteıtinin atap ótti.

Foto: Shutterstock