Eýronyń jańa banknottarynyń dızaıny Polsha men Frantsııa arasynda daý týǵyzdy
ASTANA. KAZINFORM – Eýro banknottarynyń jańartylǵan dızaıny Polsha men Frantsııa arasynda kelispeýshilik týǵyzdy. Daýdyń basy Nobel syılyǵynyń laýreaty Marııa Sklodovskaıa-Kıýrıdiń esimi jańa kýpıýralarda qalaı kórsetiletini bolyp otyr, dep habarlaıdy Euronews.
Eýropalyq ortalyq bank daıyndap jatqan eýro banknottarynyń jańa dızaıny ázirleýdiń sońǵy kezeńine jetti. Alaıda qazirdiń ózinde onyń bir elementi Eýroodaq elderi arasynda pikirtalasqa sebep boldy.
Áńgime bolashaq 20 eýrolyq kýpıýrada ǵalym Marııa Sklodovskaıa-Kıýrıdiń esiminiń qalaı jazylatyny týraly bolyp otyr. Retteýshi usynǵan jumys nusqasyna sáıkes, ol «Marie Curie (Skłodowska)» túrinde kórsetilýi tıis.
Bul sheshim kelisilgen nusqa retinde qarastyrylǵanymen, Polshada synǵa ushyrady. Kópshilik mundaı format ǵalymnyń esimindegi polıak bóligin jáne onyń ulttyq tarıhtaǵy ornyn tolyq dáriptemeıdi dep sanaıdy.
Polıak sarapshylary jańa banknottar jobasyndaǵy basqa tarıhı tulǵalardyń esimderi barlyq tildik nusqalarda ózgerissiz saqtalǵanyn aıtyp otyr. Osyǵan baılanysty Kıýrı tóńiregindegi jaǵdaı erekshe názik másele retinde qabyldanyp otyr.
Marııa Sklodovskaıa-Kıýrı 1867 jyly Varshavada dúnıege kelgen. Keıin Frantsııada halyqaralyq moıyndaýǵa ıe bolyp, Nobel syılyǵyn alǵan alǵashqy áıel atandy. Sondaı-aq ol ǵylymnyń eki túrli salasy boıynsha bul marapatqa ıe bolǵan jalǵyz adam retinde tarıhta qaldy.
Daýdyń saıası sıpaty da kúsheıip keledi. Polshada mundaı ataý formaty eldiń Eýropa ǵylymy tarıhyndaǵy rólin sımvolıkalyq túrde tómendetýi múmkin degen pikir bar.
Eýropalyq ortalyq bank ókilderi esimniń sońǵy jazylý nusqasyn bekitý úshin túrli tarıhı jáne lıngvıstıkalyq derekkózder qarastyrylyp jatqanyn málimdedi. Retteýshiniń aıtýynsha, jumys nusqasy ǵalymnyń qos biregeıligin kórsetýge baǵyttalǵan.
Eýronyń jańa dızaıny boıynsha túpkilikti sheshim 2026 jyly qabyldanady dep kútilip otyr. Bekitilgennen keıin banknottardy basyp shyǵarý jáne aınalymǵa engizý úshin taǵy birneshe jyl qajet bolady. Qazirgi eýro kýpıýralary birden aınalymnan shyǵarylmaıdy jáne zańdy tólem quraly mártebesin saqtaıdy.
Polshada Marııa Sklodovskaıa-Kıýrı beınesi ulttyq valıýtada burynnan tanys. Onyń sýreti buǵan deıin 20 myń zlotyılyq banknotta beınelengen.
Buǵan deıin Eýropalyq ortalyq bank 2029 jylǵa qaraı tsıfrlyq eýrony iske qosýǵa daıyndyqty aıaqtaýdy josparlap otyrǵanyn habarlaǵan edi.
Sondaı-aq Eýropalyq ortalyq bank basshysy merziminen buryn otstavkaǵa ketý týraly qaýesetke jaýap berdi.
