Eýronyń jańa banknottary qandaı bolady: EOB 10 dızaın nusqasyn usyndy
ASTANA. KAZINFORM – Eýropalyq ortalyq bank (EOB) jańartylǵan eýro banknottarynyń on fınaldyq dızaın nusqasyn tanystyryp, eýroaımaq turǵyndaryna ózderine unaǵan úlgige daýys berýdi usyndy, dep habarlaıdy Euronews.
Jańa banknottar zamanaýı, qaýipsiz ári ońaı tanylatyn bolýy tıis. Olar barlyq daıyndyq kezeńi aıaqtalǵannan keıin aınalymǵa shyǵarylady dep josparlanyp otyr.
Usynylǵan 1200 tujyrymdamanyń ishinen sarapshylar on eskızdi iriktep aldy. Olar «Eýropa mádenıeti» jáne «Eýropa tabıǵaty» atty eki taqyryptyq toptamaǵa bólingen.
EOB prezıdenti Krıstın Lagard Eýropa turǵyndaryn retteýshiniń resmı saıtynda jarııalanǵan onlaın daýys berýge qatysýǵa shaqyrdy. Ár taqyryp boıynsha bes-besten dızaın nusqasy ázirlengen. Olardyń qatarynda mınımalıstik te, kórkem bezendirilgen de úlgiler bar. Qoǵamdyq saýalnama nátıjesi bolashaq banknottardyń túpkilikti dızaınyn anyqtaýǵa kómektesedi.
Eger mádenıetke arnalǵan tujyrymdama jeńiske jetse, banknottarda Eýropanyń tanymal óner, ǵylym jáne ádebıet qaıratkerleri beınelenedi.
Atap aıtqanda:
-
5 eýro – opera ánshisi Marııa Kallas;
-
10 eýro – kompozıtor Lıýdvıg van Bethoven;
-
20 eýro – ǵalym, Nobel syılyǵynyń laýreaty Marııa Kıýrı;
-
50 eýro – jazýshy Mıgel de Servantes;
-
100 eýro – Leonardo da Vınchı;
-
200 eýro – Nobel beıbitshilik syılyǵynyń laýreaty Berta fon Zýttner.
Ekinshi toptama Eýropa tabıǵatyna arnalǵan. Banknottardyń betki jaǵynda ózender men tabıǵı landshafttar aıasyndaǵy ártúrli qustar beınelense, syrtqy betinde Eýropalyq odaqtyń negizgi ınstıtýttarynyń ǵımarattary ornalastyrylady.
Usynylǵan beınelerdiń qatarynda qabyrǵa qusy, kókqus, arajegish, aq degelek, biztumsyq jáne soltústik olýshasy bar. Ár qus Eýropalyq parlament, Eýropalyq komıssııa, Eýropalyq ortalyq bank, Eýropalyq odaq soty, Eýropalyq keńes jáne Eýropalyq aýdıtorlar soty sııaqty ınstıtýttardyń birimen baılanystyrylǵan.
Qoǵamdyq daýys berý aıaqtalǵannan keıin Eýropalyq ortalyq bank jeńimpaz tujyrymdamany anyqtap, jańa banknottardy shyǵarýǵa tehnıkalyq daıyndyqty bastaıdy. Retteýshiniń josparyna sáıkes, jańartylǵan kýpıýralar óndiristik rásimder tolyq aıaqtalǵannan keıin kezeń-kezeńimen aınalymǵa engiziledi.
Buǵan deıin jańa eýro banknottarynyń dızaıny Polsha men Frantsııa arasynda pikirtalas týǵyzǵany habarlanǵan edi.
