Euronews Qazaqstan týraly baǵdarlama túsirip jatyr
ASTANA. QazAqparat - «Kazakh Tourism» UQ» AQ shaqyrtýymen Qazaqstanǵa Euronews NBC túsirilim toby keldi, dep habarlaıdy QazAqparat Ulttyq kompanııanyń baspasóz qyzmetine silteme jasap.
Tanymal «Adventure» baǵdarlamasynyń avtorlary Qazaqstan týraly 4 epızod túsirýdi josparlap otyr.
«Qyzyqty saıahattar: tolassyz áser, adrenalın jáne pozıtıvti sezimder» uranyn ustanatyn «Adventure» - 250 mıllıonǵa jýyq kórermendi qamtıtyn Euronews-tiń bedeldi baǵdarlamalarynyń biri. Baǵdarlamanyń Qazaqstan týraly epızodtary bıylǵy qyrkúıekte efırden kórsetiledi», - dep habarlady «Kazakh Tourism» Ulttyq kompanııanyń baspasóz qyzmeti.
Eń aldymen baǵdarlama avtorlary Aqmola oblysyndaǵy Býrabaı kýrorttyq aımaǵynda búrkitpen ań aýlaý tásilin túsirdi. Onda jergilikti búrkitshiler jabaıy búrkitti úıretý jáne ańǵa qus salý týraly aıtyp berdi.
Qazirgi ýaqytta sheteldik top Alataý taýlarynda haıkıng, maýntaın baık jáne daýnhıll syndy belsendi saıahat túrlerin túsirip jatyr. Olar Almaty óńiriniń tabıǵı landshafty men bıik taýlaryna, kókoraı shalǵynyna joǵary baǵa berip jatyr.
«Qazaqstandaǵy demalystan tamasha áser aldym. Tabıǵaty kórkem, halqy meıirimdi. Kez kelgen týrıst úshin demalystyń túr-túrin uıymdastyrýǵa bolady. Almatydaǵy túsirilimnen soń, Aqtaýǵa baryp, djıp-týr túsiremiz», - deıdi telearna reporteri Marta Pisoni.
Qazaqstan týraly tórtinshi baǵdarlama taý-shańǵysyna arnalady jáne onyń túsirilimi jeltoqsan aıynda Almatyda júrgiziledi.
