Euronews basshysy: Jańa Konstıtýtsııa – demokratızatsııanyń biregeı qadamy
ASTANA. KAZINFORM — Ortalyq kommýnıkatsııalar qyzmetinde ótken brıfıngte Euronews dırektorlar keńesiniń tóraǵasy Pedro Vargas Davıd Qazaqstannyń jańa Konstıtýtsııasyna baǵa berdi jáne qazaq tilin halyqaralyq til dep atady.
– Qazaqstanǵa 13-14 jyldan beri turaqty túrde kelip turamyn. Ár kelgen saıyn, Qazaqstannyń damyp kele jatqanyna kýá bolamyn. Qazaqstan Prezıdentti Qasym-Jomart Toqaev eldi durys baǵytta órkendetip kele jatyr. Infraqurylym, jasandy ıntellekt, tsıfrlandyrý t.b. barlyq salada Qazaqstannyń ilgerileýi baıqalady. Sonymen qatar, sizderdi jańa Konstıtýtsııa qabyldaýyńyzben quttyqtaımyn! Bul – óte mańyzdy oqıǵa ári demokratızatsııanyń biregeı qadamy. Osyndaı jaıttar Qazaqstannyń durys baǵytta kele jatqanyn kórsetedi, – dedi ol.
Sonymen qatar, Pedro Vargas Davıd Euronews qazaqsha aqparat tarata bastaıtyndyqtan, qazaq tilin halyqaralyq tilder qataryna qosyldy dep esepteıtinin málimdedi.
– Endi biz 20 tilde aqparat taratamyz. Sonyń biri – qazaq tili. Bul til – Azııanyń ǵana emes, Eýropanyń da, jalpy Eýrazııanyń tili. Bulaı deıtinim, Qazaqstannyń bir bóligi Eýropada, ıaǵnı qazaq tili Eýropa tilderine de jatady. Bizdiń jarııalanymdarymyzdy buryn kórermender aǵylshyn, frantsýz, nemis, orys, portýgal tilderinde kóretin. Endi Eýropalyq Odaq jáne odan tys aımaqtardaǵy aýdıtorııamyz bizdiń kontentti qazaqsha da qaraıdy. Sondyqtan biz qazaq tilin endi halyqaralyq til dep bilemiz. Qazaqsha aqparat taratý – óte jaqsy jáne durys qadam, – dedi ol.
Aıta keteıik, buǵan deıin Euronews qazaq tilinde aqparat taratatynyn jazǵanbyz.
