Eýrokýbok oıyndary: Qazaqstandyq klýbtardyń 3-kezeńdegi qarsylastary anyqtaldy
ASTANA. QazAqparat - Fýtboldan Chempıondar lıgasy men Eýropa lıgasynda synǵa túsip jatqan qazaqstandyq komandalardyń úshinshi kezeńdegi yqtımal qarsylastary anyqtaldy. Bıyl Chempıondar lıgasynda elordalyq «Astana», Eýropa lıgasynda Almatynyń «Qaırat» jáne Qostanaıdyń «Tobyl» komandalary synǵa túsip jatyr, dep habarlaıdy QazAqparat tilshisi.
Shveıtsarııanyń Non qalasyndaǵy ÝEFA-nyń shtab páterinde Chempıondar lıgasy úshinshi irikteý kezeńiniń jerebesi tartyldy. Chempıondar lıgasynda synǵa túsip jatqan elordalyq «Astana» 24 shildede óz alańynda Danııanyń «Mıdtıýllann» komandasyn qabyldaıdy. Al 1 shildede Danııada qarymta oıyn ótkiziledi. Bul juptyń jeńimpazy jarystyń úshinshi irikteý kezeńinde «Dınamo» Zagreb (Horvatııa) jáne «Hapoel» Beer-Sheva (Izraıl) jubyndaǵy jeńimpazymen kezdesedi. Jarystyń kelesi satysyna shyqqan jaǵdaıda «Astana» alǵashqy oıynyn 7 tamyzda óz alańynda ótkizse, 14 tamyzda qarsylasyna qonaqqa barady.
Eýropa lıgasynda el namysyn qorǵaıtyn «Qaırat» ekinshi irikteý kezeńinde Gollandııanyń AZ (Alkmaar) komandasymen kezdesetini belgili. Bul oıyndar 26 shilde men 2 tamyz kúnderi bolady. Jeńimpaz komanda úshinshi irikteý kezeńinde Chehııanyń «Sıgma» klýbymen sheberlik baıqasady. Olarmen qos oıyn 9 jáne 16 tamyz kúnderi bolady. Osy Eýropa lıgasynda synǵa túsip jatqan taǵy bir qazaqstandyq komanda «Tobyl» ekinshi irikteý kezeńinde Armenııanyń «Pıýnıgimen» oınaıtynyn jankúıerler jaqsy biledi. Qos komanda 26 shilde men 1 tamyz kúnderi jasyl alań tórinde myqtyny anyqtaıtyn bolady. Jeńimpaz 9 jáne 16 tamyz kúnderi jarystyń úshinshi irikteý kezeńinde «Makkabı» Tel-Avıv (Izraıl) jáne «Radnıchkı» (Serbııa) komandalarynyń jeńimpazymen jolyǵady.
