Eýrokýbok: Asylhan Asan frıstaıl-akrobatıkadan altyn medal jeńip aldy
ASTANA. KAZINFORM — Qazaqstan quramasy frıstaıl-akrobatıkadan Shveıtsarııanyń Aırolo qalasynda ótip jatqan Eýropa kýbogynyń kezeńinde altyn medal enshiledi, dep habarlaıdy UOK baspasóz qyzmeti.
— Elimizge júldeni Asylhan Asan ákeldi. Qazaqstandyq sportshy erler arasyndaǵy jekeleı jarysta jeńimpaz atandy. Ol tóreshilerdiń sheshimimen 99.84 upaı jınap, jarysta jeńiske jetti, — delingen habarlamada.
Ekinshi oryndy Roman Bondarchýk (Ýkraına) ıelendi — 99.45 upaı.
Úzdik úshtikti Ellıot Prımo (Kanada) túıindedi — 93.76 upaı.
Aıta keteıik, sońǵy jyldary Qazaqstanda qysqy sport túrlerinen frıstaıl-mogýl jáne frıstaıl-akrobatıkanyń damýy qarqyn alyp keledi. Oǵan basty dádel retinde sportshylarymyzdyń Álem kýbogy jáne qysqy Azııa oıyndary sııaqty halyqaralyq iri dodalarda jeńis tuǵyrynan kórinýin aıtýǵa bolady. Osyǵan oraı, Kazinform tilshisi osy sport túriniń elimizdegi ótkeni men bolashaǵy týraly taldap kórgen edi.
