Eýrokomıssııa Ýkraınamen EO-ǵa kirý jónindegi kelissózderdi jalǵastyrýdy qoldaıdy

ASTANA. KAZINFORM — Eýrokomıssııa Ýkraınamen Eýropalyq odaqqa múshelikke ótý boıynsha kelissózderdiń alǵashqy klasterin ashýdy qoldap otyr. Bul týraly Kazinform agenttiginiń menshikti tilshisi habarlady.

— Ýkraına bir reforma artynan ekinshisin júzege asyryp jatyr. Sondyqtan komıssııa kelissózderdiń alǵashqy blogyn ashýdy qoldaıdy. Ýkraına óz mindettemelerin oryndady — endi biz de óz ýádelerimizdi oryndaýǵa tıispiz. Sebebi múshelikke qabyldaý protsesi eldiń jetistikterine negizdeledi, — dep jazdy Eýrokomıssııa prezıdenti Ýrsýla fon der Lıaıen áleýmettik jelidegi paraqshasynda.

Sonymen qatar, ol:

— Ýkraına alǵa jyljýǵa laıyq el, — dep atap ótti.

Alaıda Vengrııanyń premer-mınıstri Vıktor Orban Brıýsseldegi EO sammıtinde Ýkraınamen ıntegratsııaǵa qarsy ekenin málimdedi. Onyń aıtýynsha, vengrııalyqtardyń 95%-y Ýkraınaǵa EO-ǵa kirý boıynsha qoldaý kórsetýdi quptamaıtynyn referendýmda bildirgen.

Bul referendýmǵa shamamen 2,3 mıllıon adam qatysqan, ıaǵnı Vengrııadaǵy 8 mıllıonǵa jýyq saılaýshynyń úshten birinen de az.

— Men Eýropanyń basqa elderine Vengrııanyń Ýkraınamen EO-ǵa kirý protsesin qoldamaıtynyn jetkizemin»,— dedi Orban.

Eske sala keteıik, buǵan deıin EO Taıaý Shyǵystan óz azamattaryn evakýatsııalaý úshin azamattyq qorǵanys mehanızmin iske qosqanyn jazǵan edik.