Eýrokomıssııa Túrkııanyń 2025 jylǵa arnalǵan ekonomıkalyq ósim boljamyn tómendetti
ASTANA. KAZINFORM — Eýropalyq komıssııa kóktemgi ekonomıkalyq boljamyn jarııalap, onda Túrkııa ekonomıkasynyń 2025 jylǵa arnalǵan ósim qarqynyna qatysty kútýlerdi tómendetkenin habarlady, dep jazady Kazinform tilshisi.
Jańartylǵan derekterge sáıkes, kelesi jyly eldiń JІÓ 3,2% ornyna 2,8%-ǵa ósedi dep kútiledi. Alaıda, 2026 jylǵa arnalǵan boljam boıynsha ósim 3,5%-ǵa deıin jedeldeıdi.
Esepte Túrkııa aqsha-nesıe jáne bıýdjettik-salyq saıasatyn qatańdatý baǵytyn ustanyp otyrǵany atap ótiledi. Bul sharalar, sondaı-aq álemdik energııa tasymaldaýshylar baǵasynyń tómendeýi eldegi ınflıatsııalyq qysymnyń birtindep azaıýyna yqpal etip jatyr.
Budan bólek, bıýdjet tapshylyǵynyń qysqarýy boljanyp otyr, al memlekettik qaryz deńgeıi qalypty ári basqarylatyn kúıde saqtalady dep kútiledi.
Jańartylǵan baǵalar túrik bıliginiń joǵary ınflıatsııa men valıýta baǵamynyń qubylmalylyǵynan keıin makroekonomıkalyq jaǵdaıdy turaqtandyrýǵa degen umtylysyn kórsetedi.
Túrkııanyń Qarjy jáne qazyna mınıstri Mehmet Shımshek úkimet ekonomıkalyq baǵdarlamany dáıekti túrde júzege asyryp jatqanyn jáne onyń naqty nátıjeler bere bastaǵanyn aıtty.
— Ekonomıkalyq baǵdarlama josparǵa saı júzege asyrylyp jatyr jáne nátıjesin berip keledi, — dep atap ótti Shımshek qazirgi ekonomıkalyq jaǵdaıǵa pikir bildire otyryp.
Onyń aıtýynsha, sońǵy eki aptada elde valıýtalyq rezervterdiń qalpyna kelýi baıqalǵan, bul qarjy júıesiniń turaqtanýynyń mańyzdy kórsetkishi sanalady.
Mınıstr sondaı-aq halyqaralyq naryqtardyń seniminiń artqanyna nazar aýdardy: «ınvestorlar shyn máninde qaıta oraldy».
— Bul makroekonomıkalyq saıasattyń nyǵaıýy, aqsha-nesıe sharalarynyń qatańdaýy jáne ınflıatsııamen kúrestegi batyl qadamdar arqasynda múmkin boldy, — dep atap ótti Shımshek.
Buǵan deıin Erdoǵan jańa konstıtýtsııa qabyldaýǵa shaqyrǵanyn jazǵanbyz.