Eýrokomıssııa «tsıfrlyq táýelsizdik» úshin 180 mln eýro bóldi
ASTANA. KAZINFORM – Eýropalyq komıssııa Eýropalyq odaqtyń tsıfrlyq táýelsizdigin nyǵaıtý maqsatynda jalpy quny 180 mln eýro bolatyn «sýverendi bult» qyzmetterine arnalǵan tenderdi aıaqtaǵanyn jarııalady. Joba alty jylǵa eseptelgen, dep jazdy Anadoly agenttigi.
Málimetke sáıkes, kelisimshart tórt eýropalyq kompanııaǵa berilgen: Post Telecom (Lıýksembýrg), StackIT (Germanııa), Scaleway (Frantsııa) jáne Proximus (Belgııa). Endi EO ınstıtýttary, organdary men agenttikteri bulttyq qyzmetterdi Eýropada ornalasqan provaıderlerden alady.
Eýrokomıssııa bul sheshim strategııalyq mańyzdy tehnologııalar men ınfraqurylymǵa baqylaýdy kúsheıtýge múmkindik beretinin atap ótti. Sonymen qatar, bul bastama eýropalyq bulttyq sheshimderdi keńinen engizýge, memlekettik sektorda qaýipsiz ári zańnama talaptaryna saı tsıfrlyq qyzmetterdi qamtamasyz etýge baǵyttalǵan.
«Sýverendi bult» degen ne?
«Sýverendi bult» — bul derekterdi saqtaý men óńdeý modeli, onda uıym nemese memleket derekteri sol eldiń ulttyq zańnamasyna, derekterdi qorǵaý talaptaryna jáne tehnologııalyq baqylaý standarttaryna tolyq sáıkes túrde ornalastyrylyp, basqarylyp, saqtalady.
Aıta keteıik, buǵan deıin EO Google-diń ústemdigin shekteý úshin izdeý júıesindegi derekterdi bólisýdi talap etkenin jazǵan bolatynbyz.
