Eýrokomıssııa tóraǵasy: 2023 jyly EO-da gaz tapshylyǵy týyndaýy yqtımal

ASTANA. QazAqparat – Eýroodaq bıylǵy qysqa qajetti gaz qoryn toltyryp aldy. Alaıda kelesi jyly gaz tapshylyǵy bolýy múmkin. Bul týraly Eýrokomıssııa tóraǵasy Ýrsýla fon der Lıaıen aıtty, dep habarlaıdy QazAqparat Deutsche Welle-ge silteme jasap.

Eýroodaq bıylǵy jylytý maýsymyna qajetti gazdyń qoryn jasaqtaı aldy. Degenmen, keler jyly Reseı gaz jetkizilimin tolyq kólemde jasamasa otynnyń bul túriniń tapshylyǵy qaıta týyndaýy yqtımal. Bul týraly dúısenbi, 12 jeltoqsan kúni ótken baspasóz máslıhatynda Ýrsýla fon der Lıaıen Halyqaralyq energetıka agenttiginiń deregine súıenip málim etti.

«Qolǵa alǵan sharalarǵa qaramastan, kelesi jyly 30 mlrd tekshe metr gaz jetispeýshiligin sezinýimiz múmkin», - dedi Eýrokomıssııa tóraǵasy.

Fon der Lıaıen paıymynsha, Eýroodaq bıýdjetti qaıta qarap, reseılik gazdan túbegeıli bas tartý maqsatynda iri energetıkalyq ınvestıtsııalar úshin derbes qor qurý jóninde oılanýy qajet. Alaıda, bul úshin EO-ǵa jańa birlesken qaryzdy alýdyń qajeti bar-joǵyn Eýrokomıssııa tóraǵasy naqtylamady. Biraq blok bıýdjetine «ózge kózderden qosymshalar» qajet bolatynyn aıtyp ótti.