Eýrokomıssııa tóraǵasy dıpfeık jasaıtyn quraldy qatań synǵa aldy
ASTANA. KAZINFORM - Eýropalyq komıssııa tóraǵasy Ýrsýla fon der Lıaıen Ilon Maskke tıesili «X» platformasyn jasandy ıntellekt negizindegi «Grok» chat-boty arqyly dıpfeıkterdiń taralýyna jol berdi dep qatań synǵa aldy, dep habarlaıdy Kazinform agenttiginiń menshikti tilshisi.
Politico basylymynyń jazýynsha, Eýrokomıssııa «X» kompanııasyna qatysty resmı tergeý bastaýǵa jaqyn. Sebep — Grok jasandy ıntellekt quraly seksýaldyq sıpattaǵy beıneler jasaý úshin qoldanylýy múmkin.
Beısenbi, 8 qańtar kúni EO atqarýshy organy «Grok» kompanııasyn jasandy ıntellekt negizinde jasalǵan málimetterdi saqtaýǵa mindettedi. Bul málimdeme atalǵan qural teris kózqaras qalyptastyrǵannan keıin jasaldy.
Atalǵan talap Eýrokomıssııaǵa tergeý barysynda «X» platformasynan jáne Grok kompanııasynan qujattar men materıaldardy talap etýge quqyq beredi. Grok júıesinde «sýretti óńdeý» batyrmasy iske qosylǵan soń, paıdalanýshylar ınternettegi beınelerdi «ony bıkınıge kıgizý» nemese «kıimin sheshý» sııaqty pármender arqyly ózgerte alǵan. Bul jaǵdaı jelide kóptegen shaǵymdardyń týýyna sebep boldy.
— Bul — aqylǵa qonbaıtyn áreket. Al mundaı dıpfeıkterdiń keltiretin zııany — óte naqty ári qaýipti, — dedi Ýrsýla fon der Lıaıen Reuters pen Corriere della Sera basylymdaryn qosa alǵanda, birqatar eýropalyq BAQ-qa bergen suhbatynda.
Synnan keıin «X» kompanııasy jasandy ıntellekt arqyly sýret generatsııalaıtyn daýly fýnktsııany tek aqyly jazylymy bar qoldanýshylarǵa ǵana qoljetimdi etti, dep jazady Politico.
Aıta keteıik, budan bir aı buryn Brıýssel «X» platformasyn Eýroodaqtyń negizgi tsıfrlyq zańdarynyń biri — Tsıfrlyq qyzmetter týraly zańdy (DSA) buzǵany úshin 120 mıllıon eýro kóleminde aıyppul salǵan edi. Bul sheshim Vashıngton tarapynan jedel ári qatań reaktsııa týǵyzdy: AQSh ákimshiligi DSA-nyń bas sáýletshisi, EO-nyń burynǵy tsıfrlyq tehnologııalar jónindegi komıssary Terrı Bretonǵa elge kirýge tyıym saldy.
Osyǵan deıin Qazaqstanda dıpfeıkter úshin jaýapkershilik engiziletini týraly jazdyq.