Eýrokomıssııa TikTok-ty tsıfrlyq qyzmetter týraly zańdy buzdy dep aıyptady

ASTANA. KAZINFORM – Eýropalyq komıssııa TikTok-tyń Tsıfrlyq qyzmetter týraly EO zańyn (DSA) buzǵanyn málimdedi, óıtkeni qosymsha paıdalanýshylarda táýeldilik týdyrýy múmkin fýnktsııalardy jetkilikti deńgeıde shektemeıdi, dep habarlaıdy Euronews. 

Habarlamada aıtylǵandaı, vıdeoplatforma ekran jańartylǵan saıyn paıdalanýshylarǵa jańa kontentti úzdiksiz usynatyn sheksiz aınaldyrý (infinite scroll) sııaqty dızaın elementterin qoldanady. Eýrokomıssııa mundaı fýnktsııalar qosymshany májbúrli túrde paıdalanýǵa ıtermeleýi múmkin dep sanaıdy.

Retteýshilerdiń aıtýynsha, mundaı mehanızmder paıdalanýshylardyń mıyn «avtopılot» rejımine aýystyryp, kontentti jıi ashyp, paraqtaýǵa yntalandyrady.

Ásirese, mundaı fýnktsııalardyń balalar men jasóspirimderge áseri erekshe alańdaýshylyq týǵyzady.

Eýrokomıssııanyń málimdeýinshe, TikTok servıstiń táýeldilik týdyratyn erekshelikterine baılanysty táýekelderden paıdalanýshylardy qorǵaý úshin jetkilikti sharalar engizbegen.

— Áleýmettik jelilerge táýeldilik balalar men jasóspirimderdiń damyp kele jatqan psıhıkasyna zııandy áser etýi múmkin, — dedi juma kúni Eýrokomıssııanyń tehnologııalyq egemendik, qaýipsizdik jáne demokratııa máseleleri jónindegi atqarýshy vıtse-tóraǵasy Henna Vırkkýnen.

Onyń aıtýynsha, tsıfrlyq qyzmetter týraly zań platformalarǵa olardyń paıdalanýshylarǵa yqtımal áseri úshin jaýapkershilik júkteıdi.

— Eýropada biz balalarymyz ben azamattarymyzdy ınternette qorǵaý úshin zańnamanyń saqtalýyn qadaǵalaımyz, — dep qosty ol.

Eýrokomıssııa «Kúndelikti ekran ýaqyty» fýnktsııasyna da erekshe nazar aýdardy. 13–17 jas aralyǵyndaǵy paıdalanýshylar úshin avtomatty túrde bir saǵattyq lımıt ornatylǵanymen, retteýshilerdiń pikirinshe, bul sharanyń tıimdiligi tómen, óıtkeni eskertýlerdi ońaı elemeýge bolady.

Sondaı-aq ata-analarǵa shekteýler ornatýǵa, belsendilik týraly esep alýǵa jáne jekelegen izdeý suraýlaryn nemese heshtegterdi buǵattaýǵa múmkindik beretin «Otbasylyq jup» (Family Pairing) ata-analyq baqylaý júıesine qatysty da suraqtar týyndady. Eýrokomıssııa mundaı quraldar ata-analardan qosymsha bilim men ýaqytty talap etetindikten, olardyń tıimdiligi tómendeıdi dep sanaıdy.

Usynylǵan ózgerister qatarynda sheksiz aınaldyrýdan bas tartý, qaraý kezinde tıimdi úzilis engizý jáne beıne usynymdarynyń algorıtmderin túzetý bar.

TikTok kompanııasy retteýshiniń qorytyndylarymen kelispeıtinin málimdedi. Kompanııanyń aıtýynsha, Eýrokomıssııanyń aldyn ala baǵalaýy «bizdiń platforma týraly múlde jalǵan ári nazar aýdarýǵa turmaıtyn túsinik beredi».

— Biz bul qorytyndylarǵa qarsy barlyq qoljetimdi tásilmen shaǵymdaný úshin qajetti sharalardyń bárin qabyldaımyz, — dep habarlady TikTok.

Kompanııa ekran ýaqytyn retteýdiń ámbebap tásili joq ekenin aıtyp, paıdalanýshylarǵa ýaqytty ózdiginen baqylaýǵa arnalǵan quraldar usynylatynyn atap ótti. Olardyń qatarynda demalý týraly eskertýler, túngi rejım jáne belgilengen shekteýlerdi saqtaǵany úshin yntalandyrý júıesi bar.

Eýrokomıssııanyń tergeýi 2024 jyly bastalǵany habarlandy. Ol TikTok-tyń onlaın-platformalardyń táýekelderdi basqarýy, kontentti moderatsııalaý jáne servıster jumysynyń ashyqtyǵyn retteıtin DSA talaptaryn saqtaýyn tekserýge baǵyttalǵan.

Komıssııanyń qorytyndylary aldyn ala sıpatta bolǵandyqtan, ázirge sanktsııalar qoldanylǵan joq. TikTok jazbasha jaýap usynyp, anyqtalǵan máselelerdi joıý boıynsha sharalar usyna alady. Eger buzýshylyqtar túpkilikti rastalsa, kompanııaǵa jyldyq jahandyq aınalymynyń 6%-yna deıin aıyppul salynýy múmkin.

Aıta ketelik EO balalardyń TikTok pen Instagram-ǵa kirýine shekteý qoıǵysy keletini týraly jazǵan edik.