Eýrokomıssııa TikTok-qa qarsy is qozǵady
ASTANA. KAZINFORM – Eýropalyq komıssııa «Tsıfrlyq qyzmet kórsetý týraly» zań (DSA) boıynsha TikTok-qa qarsy resmı is júrgizýdiń ekinshi raýndyn bastady.
Eýrokomıssııa paıdalanýshylarǵa beınelerdi kórý jáne kontentke lúpil basý sııaqty áreketterge qatysqany úshin upaı jınaýǵa múmkindik beretin «TikTok Lite»-tiń «Tapsyrmalar men marapattary baǵdarlamasyna» qatysty alańdaýshylyq bildirdi. Marapattarǵa Amazon vaýcherleri, PayPal syılyq kartalary jáne TikTok monetalary dep atalatyn qoldanbadaǵy valıýta kiredi, dep atap ótti Eýropalyq komıssııa.
EO atqarýshy organy sonymen qatar paıdalanýshylar jasyn tekserý tetikteriniń áleýetti bolmaýyna baılanysty, ásirese balalardaǵy táýeldilik áseri týraly alańdaýshylyq bildirdi.
«TikTok Lite» – ınternet jyldamdyǵy tómen aımaqtarǵa arnalǵan jańa qosymsha. Ol ótken aıda Ispanııa men Frantsııada iske qosyldy.
«Biz «TikTok Lite» qyzmeti ásirese balalarda táýeldilik týdyrady dep kúdiktenemiz. Eger «TikTok» qaýipsizdiktiń senimdi dálelderin usynbasa, al ol buny osy ýaqytqa deıin jasaı almady – biz DSA-ǵa sáıkes ýaqytsha sharalar qabyldaýǵa daıynbyz. Onyń ishinde «TikTok Lite»-tiń «marapattar baǵdarlamasyn» toqtatý da bar», - dep jazdy Eýropalyq ishki naryq jónindegi komıssary Terrı Breton óziniń H áleýmettik jelisinde.
Kompanııa bul sheshimge kóńili tolmaıtynyn málimdedi.
«TikTok Lite marapattaý ortalyǵy 18 jasqa tolmaǵandar úshin qoljetimsiz jáne beıneni qaraý tapsyrmalarynda kúndelikti shekteý bar», - dedi «TikTok»-tyń jergilikti ókili BAQ-qa. Ol «Komıssııamen talqylaýdy jalǵastyratyndaryn» qosyp ótti.
Kompanııa toqtata turýǵa qarsy qorǵanys dálelderdi osy jyldyń 24 sáýirine deıin usynýy tıis.
Komıssııa isti bastaǵan EO tsıfrlyq qyzmetter týraly zańy (DSA) 17 aqpanda kúshine endi jáne jelilik sýbektilerdiń zańsyz jáne zııandy onlaın mazmunmen qalaı kúresý kerektigin retteıdi.
Buǵan deıin tanymal áleýmettik jelini Reseıde buǵattaý usynylǵan bolatyn. Qyrǵyzstanda TikTok-qa kirý shekteledi. Qazaqstanda da resýrsty buǵattaý týraly pikirtalastar júrip jatyr. Óziniń depýtattyq saýalynda senator Álisher Satvaldıev TikTok platformasynda jaǵymsyz kontenttiń taralýy máselesin kóterdi. Májilis depýtaty Erlan Saırov ta qazaqstandyqtardyń TikTok qoldanýyn shekteýge shaqyrady.
