Eýrokomıssııa Temu-ǵa qatań shara qoldanýy múmkin: kompanııaǵa iri aıyppul qaýpi tónip tur

ASTANA. KAZINFORM — Eýropalyq komıssııa Qytaıdyń Temu onlaın-platformasy zańsyz ári qaýipti taýarlardyń satylýyna tosqaýyl qoıý sharalaryn jetkilikti deńgeıde qoldanbaı otyr degen aldyn ala qorytyndyǵa keldi. Eger zańbuzýshylyqtar túpkilikti rastalsa, kompanııaǵa álemdik jyldyq aınalymynyń 6 paıyzyna deıin aıyppul salynýy múmkin. Bul týraly Euronews habarlady.

Eýrokomıssııa Temu-ǵa qatań shara qoldanýy múmkin: kompanııaǵa iri aıyppul qaýpi tónip tur
Foto: Kazinform\JI

Tergeý barysynda platformadaǵy taýarlardyń qaýipsizdigin baqylaý, kontentti tekserý jáne erejeni buzǵan satýshylarǵa shara qoldaný júıesinde birqatar kemshilik anyqtalǵan.

Atap aıtqanda, Temu satýshylardan tek taýarlardyń shekteýli sanaty boıynsha ǵana synaq hattamalaryn talap etedi. Onyń ózinde usynylǵan qujattar árdaıym muqııat tekserilmeıdi. Eýrokomıssııa ásirese elektronıka men kosmetıka sııaqty qaýip deńgeıi joǵary ónimderge baqylaýdyń jetkiliksiz ekenine nazar aýdarǵan.

Tergeýshilerdiń pikirinshe, platformanyń qazirgi moderatsııa júıesi taýarlardyń qaýipsizdigin tekserýden góri, olar týraly jarııalanǵan aqparatty baqylaýǵa kóbirek baǵyttalǵan. Sonymen qatar taýarlar assortımenti keńeıgenimen, kontentti tekseretin mamandar sany soǵan saı kóbeımegen.

Eýrokomıssııa satýshylarǵa qoldanylatyn sanktsııalarǵa da syn aıtty. Vedomstvonyń baǵalaýynsha, shekteýler kóbine naqty satýshyǵa emes, onyń jeke dúkenine ǵana qoldanylady. Sonyń saldarynan bir dúkeni buǵattalǵan satýshy basqa dúken ashyp, saýdasyn jalǵastyra alady.

Temu kompanııasy Eýrokomıssııanyń aldyn ala qorytyndysymen kelispeıtinin málimdedi.

«Zańsyz taýarlardyń taralý qaýpin azaıtýǵa baǵyttalǵan sharalarymyzǵa qatysty komıssııanyń aldyn ala qorytyndylarymen kelispeımiz», – dep habarlady kompanııa ókilderi.

Sondaı-aq platforma ókilderi ónim qaýipsizdigi talaptaryn saqtaý men baqylaý tetikterin jetildirýge qomaqty qarjy bólip jatqanyn atap ótti.

Eske salaıyq, 2026 jylǵy mamyrda Eýrokomıssııa Temu platformasyna qaýipti taýarlardy satýǵa qatysty zańbuzýshylyqtar úshin 200 mıllıon eýro aıyppul salǵan bolatyn. Olardyń qatarynda balalar oıynshyqtary men aqaýy bar qýattaǵysh qurylǵylar bolǵan.

Endi kompanııa tergeýdiń aldyn ala qorytyndylarymen tanysyp, óz qarsylyǵyn bildire alady. Eger zańbuzýshylyqtar túpkilikti rastalsa, Temu-ǵa álemdik jyldyq aınalymynyń 6 paıyzyna deıin aıyppul salynýy múmkin.

Eske sala keteıik, Eýroodaq buǵan deıin de Temu-dy tsıfrlyq qyzmetter týraly zańdy buzdy dep aıyptaǵan bolatyn.