Eýrokomıssııa reseılikterge Shengen vızasyn berý sharttaryn qatańdatady
ASTANA. KAZINFORM — Eýropalyq komıssııa reseılikterge arnalǵan vıza erejelerin qaıta qarastyryp jatyr. Brıýssel qaýipsizdik pen kóshi-qon táýekelderin eskere otyryp, Shengen vızasyn berý sharttaryn qatańdatýy múmkin. Sarapshylardyń pikirinshe, mundaı sheshim Reseı azamattaryna vıza berý kórsetkishi qaıta ósip kele jatqan tusta qabyldanýy yqtımal, dep jazdy DW.
— Biz qosymsha sharalardy engizý múmkindigin qarastyryp jatyrmyz jáne bul jumysty EO-ǵa múshe memlekettermen tyǵyz yntymaqtastyqta júrgizip otyrmyz. Qosymsha aqparatqa qatysty bolashaq sheshimderdi kútińizder, — dedi Eýrokomıssııanyń resmı ókili Markýs Lammert Brıýsseldegi brıfıngte.
Vızaǵa tolyqtaı tyıym salý Eýrokomıssııanyń quzyretine kirmeıtinin jáne mundaı sheshim búkil EO deńgeıinde qabyldana almaıtynyn atap ótti.
– Vıza berý jáne árbir ótinishti qaraý — múshe memleketterdiń quzyretine jatady. Biraq Eýropalyq komıssııa qajet bolǵan jaǵdaıda, mysaly, kóp mártelik vızalarǵa qatysty neǵurlym qatań nemese jeńildetilgen erejeler engize alady. Bul erejeler Shengen aımaǵyndaǵy barlyq konsýldyqtarda saqtalýy tıis jáne ár eldiń kóshi-qon táýekelderi men qaýipsizdik faktorlary eskeriledi, — dedi Lammert.
Brıýssel reseılikterge kóp mártelik vızalardy berýge qoıylatyn talaptardy qatańdatýy múmkin
Qaýipsizdik pen kóshi-qon táýekelderin eskere otyryp, Brıýssel qajet bolǵan jaǵdaıda Eýropa boıynsha biryńǵaı erejeler engize alady, sonyń ishinde kóp mártelik vızalar berý sharttaryn qatańdatý da bar. Degenmen, vızalyq saıasat EO-ǵa múshe memleketterdiń quzyretinde qala beredi.
Report agenttiginiń Eýropalyq bıýrosynyń habarlaýynsha, bul týraly EO resmı ókili Markýs Lammert reseılikterge shengen vızasyn berý erejelerin qatańdatý jónindegi habarlamalarǵa túsinikteme bere otyryp aıtty.
Onyń sózinshe, 2022 jyly Reseı azamattaryna qatysty belgili bir shekteýler engizilgenimen, kóp mártelik vızalar berýge tolyq tyıym salynǵan joq.
Sonymen qatar, Lammert bul jaǵdaıdyń ózgerýi múmkin ekenin meńzep, jýrnalısterge «jaqyn ýaqytta osy máselege qatysty jańalyqtar bolady» dep aıtty.
Ýkraınadaǵy soǵys bastalǵannan keıin Eýropalyq odaq Reseımen vızalardy jeńildetip berý týraly kelisimdi toqtatty jáne múshe elderge reseılikterge shengen vızasyn berýdi tómengi basymdyqqa qoıýdy, sondaı-aq qaýipsizdik pen shekara baqylaýyn kúsheıtýdi usyndy.
Sońǵy jyldardaǵy statıstıka EO-nyń Reseıge qatysty vızalyq saıasatynyń aıtarlyqtaı ózgergenin kórsetedi. 2019 jyly Reseı azamattaryna 4 mıllıonnan astam shengen vızasy berilse, 2023 jyly bul kórsetkish 500 myńǵa deıin qysqarǵan. Alaıda 2024 jyly vızalar sany qaıta óse bastaǵan, bul, múmkin, jańa shekteýlerdi qarastyrýǵa sebep bolǵan bolýy yqtımal.
Shengen aımaǵy elderine kirýdiń jańa erejeleri EO-men vızasyz rejımniń bar-joǵyna qaramastan, basqa elderdiń azamattaryna qoldanylady. Shekaradan ótkende saıahatshylardy ne kútedi jáne olar neni bilýi kerek, myna siltemeden oqyńyz.