Eýrokomıssııa prezıdenti Izraıl premer-mınıstrimen telefon arqyly sóılesti
ASTANA. KAZINFORM - Eýrokomıssııa Prezıdenti Ý.Lıaıen Izraıl premer-mınıstri B.Netanıahýmen telefon arqyly sóılesti. Bul týraly Eýropalyq komıssııa prezıdenti Ýrsýla fon der Lıaıen áleýmettik jeli arqyly málim etti, dep habarlaıdy Kazinform agenttiginiń menshikti tilshisi.
- Biz Taıaý Shyǵystaǵy oqıǵalardy alańdaýshylyqpen baqylap otyrmyz. Men beıbitshilikke, turaqtylyqqa jáne deeskalatsııaǵa ákeletin dıplomatııalyq kúsh-jigerge degen adaldyǵymyzdy rastadym.
Osy turǵyda men Izraıldiń ózin-ózi qorǵaýǵa quqyǵy bar ekenin atap óttim. Iran aımaqtyq turaqsyzdyqtyń negizgi kózi bolyp tabylady.
Eýropa árqashan aıqyn boldy: Iran eshqashan ıadrolyq qarýdy ala almaıdy.
Kelissózder sheshimine qatysty shuǵyl qajettilik bar.
Biz Irannyń ıadrolyq jáne ballıstıkalyq zymyran baǵdarlamalaryna únemi alańdaýshylyq bildiremiz. Biz Gazany da talqyladyq.
Gazadaǵy gýmanıtarlyq jaǵdaı qolaısyz. Men muqtaj azamattarǵa barlyq gýmanıtarlyq kómekti dereý jetkizýge shaqyrǵanymyzdy qaıtaladym.
Soǵys qımyldaryn birjola toqtatý úshin atysty toqtatý rejımin qalpyna keltirý jáne kepilge alynǵan adamdardy dereý bosatý qajet, - delingen Eýrokomıssııa prezıdentiniń málimdemesinde.
Buǵan deıin Eýroodaq Izraıl men Iran arasyndaǵy qaqtyǵysqa qatysty málimdeme jasaǵan bolatyn.
Eske salaıyq, 13 maýsymǵa qaraǵan túni Izraıl Iran aýmaǵyna jappaı soqqy jasaǵan. Oǵan jaýap retinde Tegeran júzden astam drondy Izraıl baǵytyna ushyrdy. Iran Natanzdaǵy ıadrolyq nysannyń zaqymdanǵanyn rastady, alaıda radıatsııanyń taralýyn joqqa shyǵardy.
BUU-daǵy Iran ókili Izraıldiń áýe soqqylary saldarynan 78 adamnyń qaza tapqanyn, taǵy 320-dan astam adamnyń jaraqat alǵanyn málimdedi. Qaza bolǵandar qatarynda Irannyń joǵary áskerı basshylyǵy men jetekshi ǵalymdar bar.
Sondaı-aq Izraıldiń shabýylynan keıin Iran Ormýz buǵazyn jabý múmkindigin qarastyryp jatqanyn Iran parlamentiniń ulttyq qaýipsizdik jáne syrtqy saıasat jónindegi komıtet múshesi Esmaıl Kosarı habarlady.
Iran men AQSh arasyndaǵy kelissózderge araǵaıyndyq jasap júrgen Oman Syrtqy ister mınıstri Badr ál-Býsaıdı Maskatta jeksenbi kúni ótýi tıis kezdesýdiń ótpeıtinin rastady.
Iran Prezıdenti Emmanýel Makronmen sóılesý kezinde Izraıl shabýyldaryn toqtatpaıynsha AQSh-pen eshqandaı kelissóz júrgizilmeıtinin málimdedi.
Axios málimetinshe, Izraıl AQSh-ty Iranmen soǵysýǵa shaqyrady.
Izraıl soqqycynan Islam revolıýtsııasy Qamqorshylar korpýsynyń barlaý basshysy men orynbasary qaza tapty.