Eýrokomıssııa prezıdenti Islandııadaǵy erip jatqan muzdyqqa barady

ASTANA. KAZINFORM — Eýropalyq komıssııanyń prezıdenti Ýrsýla fon der Lıaıen beısenbi kúni Islandııaǵa barady. Onda ol Islandııa premer-mınıstri Krıstrýn Medl Frostadoýttırmen Arktıkanyń geosaıası róli, qaýipsizdigi men daıyndyq jaıyn, sondaı-aq klımattyń ózgerýine qarsy kúres sharalaryn talqylaıdy, dep habarlaıdy Kazinform agenttiginiń menshikti tilshisi. 

Eýrokomıssııa basshysynyń sapary sońǵy jyldary temperatýranyń kóterilýinen qatty zardap shekken Soýlheımaıekıýdl muzdyǵyna ekskýrsııadan bastalady.

Odan keıin Ýrsýla fon der Lıaıen men Islandııa premer-mınıstri Grındavık qalasyna baryp, Islandııanyń Іzdeý-qutqarý qaýymdastyǵynyń ókilderimen kezdesedi. Kúnniń ekinshi jartysynda olar «Kógildir lagýna» men Svartsengı elektr stansasyn qorǵaý úshin arnaıy salynǵan qorǵanys nysandaryn aralaıdy. Bul nysandar — eldiń belsendi janartaýlar men yqtımal lava aǵyndaryna daıyndyǵynyń sımvoly.

Sodan keıin Ýrsýla fon der Lıaıen men premer-mınıstr Frostadoýttır Keflavıktegi áskerı-teńiz avıatsııalyq bazasynda Islandııa men NATO ókilderimen kezdesip, qaýipsizdik jáne jedel qorǵanys máselelerin, sonyń ishinde súńgýir qaıyq júıeleri, áýe shabýylyna qarsy qorǵanys pen azamattyq qorǵanys máselelerin talqylaıdy.

Sapar sońynda Ýrsýla fon der Lıaıen Islandııa premer-mınıstri Krıstrýn Medl Frostadoýttır jáne syrtqy ister mınıstri Torgerdýr Katrın Gýnnarsdottırmen jumys keshki asyna qatysady.

Aıta keteıik, buǵan deıin Danııa Arktıkadaǵy áskerı qatysýyn kúsheıtý úshin 2 mıllıard AQSh dollarynan astam qarjy bóletinin málimdegen bolatyn.

Eske salsaq Eýroparlament Ýrsýla fon der Lıaıenge senimsizdik votýmyn qabyldamady.