Eýrokomıssııa prezıdenti AQSh engizgen baj salyǵyna qatysty jaýap berdi

ASTANA. KAZINFORM — Eýrokomıssııa prezıdenti Ýrsýla fon der Lıaıen AQSh prezıdenti Donald Tramptyń EO-dan eksportqa 30 paıyzdyq baj salyǵyn engizý týraly málimdemesine jaýap berdi, dep jazdy Kazinform agenttiginiń menshikti tilshisi.

 — Biz AQSh prezıdenti Donald Tramp jibergen hatty nazarǵa aldyq. Onda qaıta qaralǵan tarıf mólsheri men jańa merzimder baıandalǵan. EO-dan eksportqa 30 paıyzdyq baj salyǵyn engizý negizgi transatlantıkalyq jetkizý tizbekterin buzyp, Atlant muhıtynyń eki jaǵyndaǵy kásiporyndarǵa, tutynýshylar men naýqastarǵa zııan keltirer edi. Álemde Eýropalyq odaqtyń ashyqtyq deńgeıi men ádil saýda qaǵıdattaryna adaldyǵyna teń keletin ekonomıka az, — dedi Eýrokomıssııa prezıdenti. 

Ýrsýla fon der Lıaıen EO árdaıym bul máseleni AQSh-pen kelissózder arqyly sheshýge basymdyq beretinin, bul dıalogqa, turaqtylyqqa jáne syndarly transatlantıkalyq áriptestikke beıildilikti kórsetetinin aıtty.

— Biz 1 tamyzǵa deıin kelisimge kelý úshin jumysty jalǵastyrýǵa daıynbyz. Sonymen qatar, qajet bolǵan jaǵdaıda EO múddelerin qorǵaý úshin, sonyń ishinde teńdeı qarsy sharalar qabyldaýdy qosa alǵanda, barlyq qajetti áreketterdi qabyldaımyz, — delingen Ý. Lıaıen málimdemesinde.

Aıta keteıik, AQSh prezıdenti Donald Tramp 1 tamyzdan bastap EO men Meksıka elderinen ımportqa 30 paıyzdyq baj salyǵy engiziletinin málimdegen bolatyn.

Ol bul tarıf «bizde EO-men qalyptasqan saýda tapshylyǵyn joıýǵa jetpeıdi» dep atap ótti jáne eýropalyq kompanııalar AQSh-ta óndiris ashatyn bolsa, onda olar bul salyqty tólemeıtinin qosty.

Sonymen qatar, Donald Tramp Brazılııaǵa qarsy 50 paıyzdyq tarıf engizip otyr.