Eýrokomıssııa óz qyzmetkerlerine TikTok qoldanýǵa tyıym saldy

ASTANA. QazAqparat – Eýrokomıssııa óz qyzmetkerlerine korporatıvtik telefon men gadjetterden, sondaı-aq jumys baǵdarlamalary ornatylǵan jeke qurylǵylardan qytaılyq TikTok áleýmettik jelisin óshirip tastaýdy buıyrdy. Mundaı sheshim Eýrokomıssııanyń kıberqaýipsizdik erejelerin qabyldaýymen baılanysty, dep habarlaıdy QazAqparat Euronews-ke silteme jasap.

Eýropa odaǵynyń atqarýshy bıliginiń vedomstvo qyzmetkerleri men sheneýnikterine jumys qurylǵylarynan TikTok-ty óshirip tastaýǵa 15 naýryzǵa deıin ýaqyt berildi.
Іshki naryq máseleleri jónindegi eýrokomıssar Terrı Breton: «Eýrokomıssııa áriptesterimizdiń jáne bizben seriktestik ornatqandardyń barlyǵynyń kıberqaýipsizdigine alańdaıdy. Sheshim kıberqaýipsizdik maqsatynda qabyldanyp otyr», - dep atap ótti.
Al eýropalyq BAQ taratyp jatqan TikTok ókiliniń málimdemesinde kompanııa mundaı sheshimge ókinish bildiretini jáne ol «qate ári teris pikirge negizdelgen» dep jazylǵan.
Keıingi aılarda TikTok Batystyń jiti nazaryna ilikti. Olar qytaı bıligi TikTok qoldanýshylarynyń jeke derekterin paıdalana alady dep qaýiptenedi.

AQSh-ta baǵdarlamany federaldy úkimet qurylǵylarynda paıdalanýǵa tyıym salynǵan. Al keı amerıkalyq zań shyǵarýshylar elde TikTok jumysyn tolyq toqtatýǵa tyrysyp jatyr.