Eýrokomıssııa Meta-ǵa mıllıardtaǵan eýro aıyppul salýy múmkin
ASTANA. KAZINFORM — Eýropalyq komıssııanyń málimetinshe, Meta kompanııasy Instagram men Facebook platformalaryndaǵy paıdalanýshylardyń táýeldiligin arttyrýy múmkin dızaınnyń qaýpin elemegen. Bul týraly DW jazdy.
Komıssııanyń málimetinshe, Instagram men Facebook paıdalanýshylaryna beıneler men basqa da kontent úzdiksiz, avtomatty túrde usynylady. Sonyń saldarynan adam mıy «avtopılot rejımine» aýysyp, bul olardyń psıhıkalyq jáne fızıkalyq densaýlyǵyna keri áser etýi múmkin.
Osyǵan baılanysty Eýrokomıssııa Meta kompanııasynan beınelerdiń avtomatty túrde oınatylýyn ádepki baptaýda óshirýdi, sondaı-aq paıdalanýshylarǵa qosymshany qoldaný barysynda mindetti úzilister engizýdi talap etti. Budan bólek, áleýmettik jelilerdiń algorıtmderi paıdalanýshynyń sońǵy kórgen kontentine azyraq táýeldi bolýy tıis.
Eýropalyq odaqtyń Tsıfrlyq qyzmetter týraly zańy (Digital Services Act) aıasynda Instagram men Facebook Eýrokomıssııanyń baqylaýynda. Komıssııa platformalardyń zań talaptaryn saqtaýyn qadaǵalaıdy. Eger talaptar buzylsa, Meta kompanııasyna álemdik jyldyq aınalymynyń 6 paıyzyna deıin aıyppul salynýy múmkin.
Aıta keteıik, jaqynda Meta jańa servısti iske qosty. Endi Instagram-daǵy sýretterińizdi JI paıdalanýy múmkin.
