Eýrokomıssııa KVI vaktsınalaryn satyp alýǵa qatysty derekterdi jarııalaýdan bas tartty
ASTANA. KAZINFORM — Eýroodaq bıligi Eýropalyq komıssııa tóraǵasy Ýrsýla fon der Lıaıen men Pfizer kompanııasynyń bas dırektory Albert Býrla arasyndaǵy COVID-19 vaktsınasyn satyp alýǵa baılanysty hat-habarlardy jýrnalısterge usynýdan taǵy da bas tartty, dep DW.
Atalǵan jazbalardy jarııalaý týraly saýaldy amerıkalyq The New York Times gazeti joldaǵan. Alaıda Eýropalyq komıssııa 2021 jyldyń qańtarynan 2022 jyldyń 11 mamyryna deıingi hat almasýlardyń saqtalmaǵanyn málimdedi.
— 2021 jyldyń basynda Eýroodaq Pfizer kompanııasynan 1,8 mıllıard dozaǵa deıin koronavırýs vaktsınasyn satyp alý týraly kelisimge kelgende, bul kelisimniń qalaı júzege asqanyna úlken qyzyǵýshylyq týdy, — dep túsindiredi basylym óz saýalynyń sebebin.
Keıinirek fon der Lıaıen men farmatsevtıkalyq kompanııa basshysy arasyndaǵy kelissózder messendjer arqyly jiberilgen mátindik habarlamalar arqyly júrgizilgeni belgili boldy.
Eýrokomıssııa Pfizer basshylyǵymen COVID-19 vaktsınalaryn jetkizýge baılanysty hat almasýlar boıynsha júrgizilgen sot isinde jeńiliske ushyrady. 2025 jyldyń 14 mamyrynda Eýropalyq Odaqtyń soty The New York Times gazetiniń Brıýsseldiń tıisti SMS-habarlamalardy jarııalaýdan bas tartýyna qatysty talabyn qanaǵattandyrdy.
«Pfaızergeıt» dep atalǵan iske qatysty sheshim shyǵara otyryp, Lıýksembýrg soty Eýroodaqtyń qujattarǵa qol jetkizý tártibine silteme jasady, oǵan sáıkes barlyq eýropalyq ınstıtýttardyń qujattary jurtshylyq úshin qoljetimdi bolýy tıis. Sondaı-aq, sot Eýrokomıssııanyń nege qajetti qujattardy taba almaǵanyn jáne nege COVID-19 vaktsınalaryn satyp alýǵa qatysty hat almasý mańyzdy aqparattan turmaıdy dep eseptegenin senimdi túrde túsindire almaǵanyn atap ótti.
2021 jyldyń kókteminde jalǵasyp jatqan pandemııa aıasynda Eýrokomıssııa Pfizer jáne onyń nemis seriktesi BioNTech kompanııalarymen shamamen 39 mıllıard dollar somasyna 1,8 mıllıard doza Comirnaty vaktsınasyn jetkizý jóninde kelisimshartqa otyrdy. Bul kelisimniń kóptegen tarmaǵy qupııa saqtalyp, protseske qatysty ashyqtyqtyń bolmaýy týraly synǵa ushyrady.
2025 jylǵy 10 shildede Eýropalyq parlament Eýrokomıssııa tóraǵasy men onyń quramyndaǵy 26 komıssarǵa senim bildirý týraly daýys berdi. Daýys berý barysynda 553 depýtattyń 360-y fon der Lıaıenge qoldaý bildirse, 175-i qarsy daýys berip, taǵy 18 depýtat qalys qaldy. Eýrokomıssııa basshysyna baǵyttalǵan syn men senimsizdik týraly bastamalar pandemııa kezinde Pfizer basshysymen bolǵan hat almasý tóńiregindegi daýǵa baılanysty týyndady.
Osyǵan deıin Eýrokomıssııa prezıdenti EO-nyń 2 trln eýro kólemindegi strategııalyq bıýdjetin usyndy.