Eýrokomıssııa kıberbýllıngke qarsy kúres jónindegi is-qımyl josparyn iske qosty
ASTANA. KAZINFORM – Eýropalyq atqarýshy organ seısenbi kúni Internette jastardyń quqyqtaryn qorǵaý úshin kıberbýllıngke qarsy kúres jónindegi is-qımyl josparyn iske qosqanyn jarııalady, dep habarlaıdy Kazinform menshikti tilshisi.
Jospar ınternette balalar men jasóspirimderdiń psıhıkalyq densaýlyǵyn qorǵaýǵa baǵyttalǵan.
Oǵan mynalar kiredi:
• onlaın býllıng qurbandary kómekke ońaı qol jetkize alatyn jalpyeýropalyq qosymshany engizý;
• ınternette zııandy minez-qulyqpen kúresýdiń ulttyq tásilderin úılestirý;
• qaýipsiz jáne tıimdirek sandyq tájirıbelerdi nasıhattaý arqyly kıberbýllıngtiń aldyn alý.
Kıberbýllıng (sandyq qýdalaý) – sandyq tehnologııalardy (áleýmettik jeliler, habar almasý qosymshalary, oıyn platformalary) paıdalanyp, adam týraly qasaqana qorlaý, qorqytý nemese áshkereleý aqparatyn taratý.
Kádimgi daýdan aıyrmashylyǵy – kıberbýllıng júıeli sıpatqa ıe jáne jábirlenýshini qorqytý, ashýlandyrý nemese uıaltýǵa baǵyttalǵan.
- Balalar men jasóspirimderdiń ınternettegi qaýipsizdikke quqyǵy bar. Kıberbýllıng bul quqyqty buzady, olarǵa aýyrsyný, jalǵyzdyq jáne qorlaý sezimin týdyrady. Eshbir bala mundaı sezimge túspeýi kerek. Bul is-qımyl jospary kámeletke tolmaǵandardy ınternette qorǵaýǵa arnalǵan qoldanystaǵy quraldar jınaǵyn tolyqtyrady jáne EO men múshe memleketterdi kıberbýllıngpen barlyq deńgeıde kúresýge úılesimdi tásil ázirleýge shaqyrady, - dep málimdedi Tehnologııalyq egemendik, qaýipsizdik jáne demokratııa jónindegi atqarýshy vıtse-prezıdent Henna Vırkkýnen.
Elimizdiń bilim salasynda býllıng pen kıberbýllınge qarsy kúres qalaı júrip jatqanyn myna materıaldan oqı alasyz. https://kaz.inform.kz/news/blm-salasinda-bulling-pen-kiberbullinge-karsi-kures-kalay-zhurp-zhatir-bd92f1/
Sondaı-aq Balalar quqyqtaryn qorǵaý komıteti jańa alaıaqtyq týraly eskertkenin jazdyq.
