Eýrokomıssııa EO elderinde baspana máselesi ýshyǵyp turǵanyn moıyndady
ASTANA. KAZINFORM — Eýropalyq Odaq qalalarynda baspananyń qoljetimdiligi kúrdeli máselege aınaldy.
Qala turǵyndarynyń jartysynan astamy bul máseleni shuǵyl sheshýdi qajet etedi dep esepteıdi. Eýrokomıssııa uzaq merzimge qoljetimdi turǵyn úı sanyn saqtap qalý úshin naqty sharalar qabyldaý qajet ekenin málimdedi.
— Eýropalyqtar úshin baspananyń qoljetimdi bolmaýy eń ózekti máselelerdiń birine aınaldy. Eurobarometer derekterine sáıkes, qala turǵyndarynyń 50 paıyzdan astamy turǵyn úı máselesin shuǵyl sheshýdi qajet etetin ózekti problema dep sanaıdy, — delingen Eýrokomıssııa málimdemesinde.
Eýrokomıssııa atap ótkendeı, turǵyn úı daǵdarysy halyqqa ǵana emes, Eýropalyq Odaq ekonomıkasyna da áser etedi. Qoljetimdi baspananyń tapshylyǵy eńbek kúshiniń utqyrlyǵyn jáne bilim alý múmkindikterin shektep, nátıjesinde EO-nyń básekege qabiletine de kesirin tıgizedi.
Eýrokomıssııa uzaq merzimge jalǵa alýǵa nemese turýǵa qoljetimdi turǵyn úı kólemin azaıtatyn tájirıbelerge qarsy sharalar qabyldaýdy usynyp otyr. Bul másele ásirese týrıster kóp keletin qalalarda ótkir turǵandyqtan, olarǵa erekshe nazar aýdarylmaq.
Eýrokomıssııanyń usynystary Eýroparlament pen EO Keńesiniń qaraýyna jiberiledi.
Eske salaıyq, buǵan deıin EO-nyń bes eli zańsyz mıgranttardy úshinshi elderge jiberýdiń jańa júıesin ázirlep jatqanyn jazǵanbyz.
