Eýrokomıssııa EO elderin shekaralyq baqylaýdy kezeń-kezeńimen toqtatýǵa shaqyrdy
ASTANA. KAZINFORM – Eýrokomıssııa Germanııany jáne Eýroodaqtyń taǵy segiz memleketin ishki shekaralardaǵy baqylaýdy birtindep toqtatýǵa shaqyrdy, dep habarlaıdy DW.
EO-nyń kóshi-qon máseleleri jónindegi komıssary Magnýs Brýnnerdiń aıtýynsha, qazirgi jaǵdaıda shekaralyq baqylaýdy qysqartýǵa múmkindik bar.
– Eýrokomıssııanyń pikirinshe, qazirgi ýaqytta shekaralyq baqylaý júrgizilip jatqan toǵyz múshe memlekette, onyń ishinde Germanııada da bul sharany kezeń-kezeńimen toqtatý oryndy ári múmkin bolyp otyr, – dedi Magnýs Brýnner Funke medıatobyna bergen suhbatynda.
Ol bul málimdemeni Eýropalyq odaqtaǵy baspana berý júıesin reformalaý týraly jańa erejeler kúshine enýine bir apta qalǵanda jasady.
Eýrokomıssııa ókili óz ustanymyn Eýroodaq elderinde baspana suraýshylar sanynyń aıtarlyqtaı azaıýymen jáne syrtqy shekaralardy qorǵaý sharalarynyń tıimdiligimen túsindirdi.
– Baspana suraýshylar sany kúrt tómendedi. Sonymen qatar syrtqy shekaralardy qorǵaý jáne Eýropa boıynsha biryńǵaı kirý-shyǵý júıesi sekildi qabyldanǵan sharalar naqty nátıje berip jatyr, – dedi ol.
Shengen keńistiginde negizinen erkin júrip-turý qaǵıdaty qoldanylady. Alaıda sońǵy jyldary qaýipsizdik pen kóshi-qon máselelerine baılanysty birqatar el ýaqytsha shekaralyq baqylaý engizgen.
Germanııada shekaradaǵy baqylaý 2025 jyldyń kókteminde kúsheıtildi. Bul sheshimdi bılikke kelgennen keıin Germanııanyń ishki ister mınıstri Aleksandr Dobrındt qabyldaǵan bolatyn.
Aıta keteıik, Eýroodaqtyń baspana berý júıesin reformalaý jónindegi jańa erejeleri 12 maýsymda kúshine enedi. Qujat EO aýmaǵyna keletin bosqyndar sanyn azaıtýǵa baǵyttalǵan jáne baspana izdeýshilerge qoıylatyn talaptardy qatańdatýdy kózdeıdi.
Eske sala keteıik, buǵan deıin Eýrokomıssııa «tsıfrlyq táýelsizdik» úshin 180 mln eýro bólgeni habarlandy.
