Eýrokomıssııa elektromobılderge kóshý erejelerin jeńildetýdi usynady

ASTANA. KAZINFORM — Eýrokomıssııa 2035 jylǵa qaraı elektromobılderge kóshý erejelerin jeńildetý úshin aýqymdy sharalar paketin usyndy. Bul usynystar Eýropalyq odaqtyń avtomobıl ónerkásibin qoldaý maqsatynda jasaldy, dep jazady DW.

Qazirgi ýaqytta EO avtopromy qıyn jaǵdaıǵa tap bolǵan: benzındi jáne dızeldi kólikterdiń satylymy tómendegen, al elektromobılder naryǵynda arzan modelder usynatyn qytaılyq óndirýshiler belsendi túrde jumys istep jatyr. Jalpy EO-da elektromobılderge degen suranys baıaý ósim kórsetip otyr.

Bastapqyda 2035 jyldan bastap EO-da tek CO₂ shyǵarmaıtyn kólikterdi tirkeýge ruqsat beriledi dep josparlanǵan bolatyn. Bul óz kezeginde elektromobılderge tolyq kóshý degendi bildiredi. Alaıda, Eýrokomıssııa qazirgi usynysynda 2021 jylmen salystyrǵanda shyǵaryndylardy 100%-dan 90%-ǵa deıin tómendetýdi usynady. Qalǵan 10%-dy óndirýshiler «jasyl» bolattardy qoldaný jáne qaldyqtardan alynatyn bıootyn sııaqty ekologııalyq taza otyndardy paıdalaný arqyly óteı alady. Bul ózgerister gıbrıdti kólikterdi jáne keıbir ishki janý qozǵaltqyshy bar modelderdi naryqta saqtaýǵa múmkindik beredi.

EO elderiniń osy másele boıynsha saıası pozıtsııalarynda aıtarlyqtaı aıyrmashylyqtar bar. Germanııa, Italııa, Polsha jáne basqa iri avtokólik óndirýshileri bar memleketter joǵary energııa shyǵyndary men Qytaıdan sýbsıdııalanǵan modeldermen básekelestikti eskere otyryp, erejelerge kóp jeńildik berýdi talap etip otyr.

Ispanııa, Danııa, Shvetsııa jáne Nıderlandy, kerisinshe, erejelerdiń jumsarýy elektromobılderge suranystyń tómendeýine, zaýyttardyń jabylýyna jáne jumys oryndarynyń joǵalýyna ákeledi dep alańdaı otyryp, qatań saıasatty saqtaýdy talap etedi.

Eýrokomıssııa, Eýroparlament jáne EO Keńesi arasyndaǵy kelissózder qıyn bolary anyq. Sebebi reformany qabyldaý úshin depýtattardyń kópshiliginiń jáne EO turǵyndarynyń 65%-yn qamtıtyn kem degende 15 eldiń kelisimi qajet.

Sarapshylar kez kelgen qosymsha belgisizdik eýropalyq avtoónerkásipke, ásirese Qytaı tarapynan qatty básekelestik jaǵdaıynda, keri áserin tıgizýi múmkin ekenin eskertedi.

Budan buryn Eýropalyq Odaqta elektromobılderge degen qyzyǵýshylyq tómendegenin jazǵanbyz.

Sonymen qatar jaqynda Qazaqstanda jeńildikpen elektrli kólikterdi ákelýge bólingen kvota taýsyldy. Kazinform agenttiginiń tilshileri shekaradaǵy jaǵdaıdy baqylap, kólikterdiń Qytaıdan qalaı jetkiziletinin kórip qaıtty.