Eýrokomıssııa basshysy: Ortalyq Azııa klımattyń ózgerýi saldaryn kórip jatyr
«Táýelsizdik alǵannan bergi 30 jyl ishinde Ortalyq Azııa elderiniń ekonomıkasy turaqty negizde ósip keldi. Alaıda KVI pandemııasy barshamyzǵa birshama kedergi keltirgeni anyq. Bizdiń yntymaqtastyq ekonomıkalarymyzdyń ilgerileýin qaıta jandandyra alady. Osy baǵyttaǵy qadamdar uzaq merzimdi perspektıvada Ortalyq Azııa elderiniń ekonomıkasyn qýatty, turaqty ete alady. Biz Eýropada da osy baǵytta umtylys jasap kelemiz. Osy oraıda ekonomıkamyzdy ózgertý úshin qalpyna keltirý josparymyzǵa qomaqty qarajatty salyp jatyrmyz. Sonymen qatar, taza energetıkaǵa kóshýdi jyldamdatyp kelemiz. Tsıfrlyq ınfraqurylymǵa mamandar men kompanııalardy kóptep jumyldyryp jatyrmyz», - dedi Ýrsýla fon der Lıaıen.
Ol búgingi forýmda ekologııalyq qalpyna keltirý, tsıfrlandyrý, qolaıly iskerlik klımat sekildi úsh negizgi pýnktige ekpin qoıylyp otyrǵanyn eske saldy.
«Osy salalarda Ortalyq Azııadaǵy elderge tyǵyz yntymaqtastyqty usynyp otyrmyz. Bul baǵyttaǵy máselelerdi sheshýge barshamyz múddelimiz. Klımattyń ózgerýi Ortalyq Azııaǵa óz yqpalyn tıgizip jatyr. Bıyl bolǵan qurǵaqshylyq egis alqaptaryna, janýarlarǵa zalal keltirip, sý qoımalaryn qurǵatty. Degenmen Ortalyq Azııa jańartylǵan energııa kózderiniń osyǵan deıin paıdalanylmaı kelgen eleýli áleýetine ıe. Investıtsııalar durys baǵytta júrgizilse, onda osy óńirdiń kómir men ózge de otyn túrlerine degen táýeldiligi tómendeı túsedi. Osy oraıda joǵary sapaly jumys oryndary qurylyp, aýany tazartýǵa jol ashylady», - dedi ol.
Bul rette ol EO men Ortalyq Azııa óńirin birlese jumys isteýge shaqyrdy.
«Ortalyq Azııanyń gúldenýi Eýropa úshin mańyzdy. Bizdiń seriktestik óńir halyqtary úshin shyn máninde mańyzǵa ıe bola alady», - dedi Ýrsýla fon der Lıaıen.
Budan buryn habarlanǵandaı, búgin Bishkekte Premer-Mınıstrler deńgeıinde «Eýropalyq Odaq – Ortalyq Azııa» ekonomıkalyq forýmy bastaldy .
Búgin Bishkekte QR Úkimet basshysy Asqar Mamın Eýropalyq komıssııanyń vıtse-prezıdenti Valdıs Dombrovskıspen kezdesti .
