Eýrokomıssııa basshysy Djo Baıdendi prezıdent saılaýyndaǵy jeńisimen quttyqtady
« Men shyn júrekten Djo Baıden myrzany AQSh-taǵy prezıdent saılaýyndaǵy jeńisimen quttyqtaımyn. Onymen múmkindiginshe tezirek kezdesýdi asyǵa kútemin.
Eýropalyq Odaq pen Qurama Shtattar - dos ári odaqtas. Biz birlese otyryp, ortaq tarıh pen demokratııanyń, bostandyqtyń, adam quqyqtarynyń, áleýmettik ádilettilik pen ashyq ekonomıkanyń ortaq qundylyqtaryna negizdelgen teńdessiz transatlantıkalyq seriktestik qurdyq. Bul seriktestik ondaǵan jyldar boıy erejelerge negizdelgen lıberaldy halyqaralyq tártiptiń negizi retinde qyzmet etip keledi jáne Atlantıkanyń eki jaǵynda da turaqtylyq, qaýipsizdik jáne órkendeý tiregi bolyp qala beredi.
Álem ózgerip, jańa syn-qaterler men múmkindikter paıda bolǵan saıyn bizdiń jańartylǵan seriktestigimiz erekshe mánge ıe bolady.
Eýropalyq komıssııa búgingi tańdaǵy ózekti máselelerdi sheshý úshin jańa ákimshilikpen jáne jańa Kongrespen yntymaqtastyqty jandandyrýǵa daıyn. COVID-19 pandemııasymen jáne onyń ekonomıkalyq, áleýmettik saldarymen kúres, klımattyń ózgerýimen birlesken kúres, adamdarǵa paıda ákeletin tsıfrlyq transformatsııany ilgeriletý, bizdiń ortaq qaýipsizdigimizdi nyǵaıtý, sondaı-aq qaǵıdalarǵa negizdelgen kópjaqty júıeni reformalaý sekildi mańyzdy máselelerdi sheshý mindeti tur», - delingen Ýrsýly fon der Lıaıen málimdemesinde.
Buǵan deıin habarlanǵandaı, Amerıka Qurama Shtattarynda ótip jatqan prezıdent saılaýynda demokratııalyq partııa atynan baq synaǵan Djo Baıden jeńiske qajet daýysty jınady.
Eske sala keteıik, Qazaqstan Prezıdenti Qasym-Jomart Toqaev AQSh-taǵy prezıdent saılaýynda jeńiske jetken Djo Baıdendi quttyqtaǵan bolatyn.
Avtory: Arnur Rahymbekov
